ئیسپانیا داوای هەڵمەتێکی جیهانی بۆ ڕاگرتنی جەنگ لە غەززە دەکات

ئاڤا نیوز

 

سەرۆکوەزیرانی ئیسپانیا داوا لە نەتەوە یەکگرتووەکان و دەوڵەتان دەکات، دەستبەجێ هەنگاوی گرنگ بنرێت بۆ ڕاگرتنی جەنگ لە غەززە.

 

وێنە گەورەکە: بەردەوامی جەنگ لە غەززە و گەمارۆدانی شارەکە و ڕێگریکردن لە چوونە ژوورەوەی هاوکارییە مرۆییەکان بۆ ماوەی 80 ڕۆژ کارەساتی مرۆیی لە غەززە دروست کرد، دەیان منداڵ و کەسانی بەساڵاچوو لە برسێتیدا گیانیان لەدەستدا، دوای فشاری نێودەوڵەتیی ڕۆژی دووشەممە ئیسرائیل ناچارکرا بە کردنەوەی دەروازەیەک بۆ چوونە ژوورەوەی بڕێکی کەم لە هاوکارییە مرۆییەکان.

 

لێدوانی فەرمی: پێدرۆ سانچێز، سەرۆکوەزیرانی ئیسپانیا لە بانگەوازێکدا بۆ جیهان داوا دەکات هەنگاوی بەپەلە بنرێت بۆ ڕێگریکردن لە ڕوودانی گەورەترین کارەساتی مرۆیی سەدە لە شاری غەززە و ڕایگەیاند: نەتەوە یەکگرتووەکان و دەوڵەتانی بەرگریکار لە مافەکانی مرۆڤ بە زووترین کات هەنگاو بنێن بۆ ناچارکردنی ئیسرائیل بە ڕاگرتنی جەنگ و هەڵگرتنی گشتگیر و تەواوی گەمارۆکان، بە پێجەوانەوە گەورەترین کارەساتی مرۆیی ڕوودەدات.

 

ئەوەی پێویستە بیزانیت: لە مانگی 11ی ساڵی ڕابردوو دادگای نێودەوڵەتیی تاوانەکان بڕیاری دەستگیرکردنی بۆ بنیامین نەتانیاهۆ، سەرۆکوەزیارنی ئیسرائیل دەرکرد، بە تۆمەتی تاوانی جەنگ، ئێستا دۆسیەیەکی ئەنجامدانی تاوانی کۆمەڵکوژی لە دادگای دادی نێودەوڵەتیی ڕووبەڕووی ئیسرائیل کراوەتەوە.

 

زانیاریی زیاتر: فەرەنسا و بەریتانیا و کەنەدا هەڕەشە لە ئیسرائیل دەکەن لە ئەگەری ڕانەگرتنی جەنگ و هەڵنەگرتنی گەمارۆی سەر غەززە، ئەوا هەنگاوی دیپلۆماسی و ئابووری دژ دەگرنەبەر و سزای ئابووری دەخەنە سەر ئیسرائیل.