مارکۆ ڕوبیۆ: سووریا چەند هەفتەیەک لە شەڕی ناوخۆوە دوورە

ئاڤا نیوز

مارکۆ ڕوبیۆ، وەزیری دەرەوەی ئەمریکا ڕایگەیاند ئەگەری هەیە سووریا تەنیا چەند هەفتەیەک لە ڕوودانی شەڕێکی نوێی ناوخۆوە دوور بێت. ڕوبیۆ داوای کرد هاوکاریی سەرکردایەتیی قۆناغی گوێزانەوەی سووریا بکرێت.

 

لێدوانی فەرمی: وەزیری دەرەوەی ئەمریکا لەمیانەی دانیشتنێک بۆ وەڵامدانەوەی پرسیارەکانی ئەندامانی ئەنجوومەنی پیران، گوتی "لە ڕاستیدا، لە هەڵسەنگاندنی ئێمەدا، ڕاشکاوانە، دەستەڵاتی کاتیی سووریا، بەگوێرەی ئەو ئالنگارییانەی کە ڕووبەڕووی دەبێتەوە، لەوانەیە چەند هەفتە، نەک چەند مانگ، دووربێت لە داڕمانی تەواوەتی و شەڕێکی ناوخۆیی ڕاستەقینەی گەورە، کە بە شێوەیەکی بنەڕەتی وڵاتەکە تووشی لێکترازان دەکات."

 

ڕوبیۆ گوتیشی "بێمتمانەییەکی قووڵی ناوخۆیی لە سووریا هەیە، چونکە دەستەڵاتی بەشار ئەسەد پێکهاتەکانی سووریای کردوونەتە دوژمنی یەکدی". 

 

باکگراوند: ئەم لێدوانەی ڕوبیۆ لە کاتێکدایە، دۆناڵد ترەمپ، سەرۆکی ئەمریکا، لەمیانەی سەردانەکەیدا بۆ ناوچەکە، لە ڕیازی پایتەختی سعودیە، چاوی بە ئەحمەد شەرع، سەرۆککۆماری کاتیی سووریا کەوت و دواتریش بڕیاری هەڵگرتنی سزاکانی سەر سووریای دەرکرد.