سعوودیە: هەر کەسێک بێ مۆڵەتی فەرمی بێتە حەج زیاتر لە پێنج هەزار دۆلار سزا دەدرێت

ئاڤا نیوز

شانشینی سعوودیە، جارێکی دیکە هۆشداریی دا لە پێشێلکردنی رێسا و رێنوێنییەکانی حەج، جەختی لەوە کردەوە، 20 هەزار ریاڵی سعوودی، کە دەکاتە زیاتر لە پێنج هەزار دۆلاری ئەمریکی سزا بەسەر هەر کەسێکدا دەسەپێندرێت کە بەبێ مۆڵەتی فەرمی حەج دەکات، یان هەوڵی ئەنجامدانی دەدات.

وێنە گەورەکە: ساڵانە لە وەرزی حەجکردن، لەسەر ئاستی جیهان بە سەدان هەزار کەس بە مەبەستی بەجێگەیاندنی فەریزەی حەج ڕوو لە سعوودییە دەکەن، لەوانەش هەرێمی کوردستان کە  ئەمساڵ پێنج هەزار و 190 حەجخواز بەشداری لە فەریزەی حەج دەکەن، بە هەردوو ڕێگای وشکانی و ئاسمانی بەچەند کاروانێک گەشتی سعوودیە دەکەن.

ڕاگەیێنراوی فەرمی: وەزارەتی ناوخۆی سعوودیە لە ڕاگەیێنراوێکدا ڕایگەیاندووە کە سزای دارایی تا 20 هەزار ڕیاڵ (زیاتر لە پێنج هەزار دۆلاری ئەمریکی) بەسەر هەرکەسێکدا دەسەپێندرێت بەبێ مۆڵەت حەج ئەنجام دەدات یان هەوڵی ئەنجامدانی دەدات، دزەکارانی حەج لەنێو دانیشتوانی سعوودیە یان ئەوانەی پێشێلکاریی ڕێکارەکانی وڵاتەکانیان کردووە دیپۆرت دەکرێنەوە بۆ وڵاتەکانیان و بۆ ماوەی 10 ساڵ قەدەغە دەکرێن بچنە ئەو وڵاتە.

زانیاریی زیاتر: وەزارەتی ناوخۆ داوای لە هەموو لایەک کردووە، "پابەندبن بە ڕێسا و ڕێنماییەکانی حەج، کە ئامانجیان پاراستنی ئاسایش و سەلامەتی حاجییانە بۆ ئەوەی بتوانن بە ئاسانی و ئارامی سرووتەکانیان ئەنجام بدەن".