کۆمیسیۆن بۆ ئاڤا: 114 حیزب و 20 هاوپەیمانی بۆ بەشداریکردن لە هەڵبژاردن تۆمارکراون

ئاڤا نیوز

کۆمیسیۆنی باڵای سەربەخۆی هەڵبژاردنەکانی عێراق ڕایگەیاند، تا دوێنێ چوارشەممە 114 حیزب و 20 هاوپەیمانی بۆ بەشداریکردن لە هەڵبژاردنی پەرلەمانی عێراق تۆمارکراون.

وێنە گەورەکە: بۆ بەشداریکردن لە هەڵبژاردنی داهاتووی پەرلەمانی عێراق، کۆمیسیۆن دەرگای بۆ حیزب و لایەنە سیاسییەکان کردەوە بۆ خۆتۆمارکردن و دروستکردنی هاوپەیمانی. و تا ئەمڕۆ کە دوا وادەیە، 20 هاوپەیمانی تۆمارکراون.

ئەوەی پێویستە بیزانیت: ئەمڕۆ دوا وادەیە لەبەردەم حیزبە سیاسییەکان و هاوپەیمانێتییەکان تا ناوی خۆیان بۆ بەشداریکردن لە هەڵبژاردن تۆماربکەن، لە قۆناغی داهاتووشدا کۆمیسیۆن دەستدەکات بە وەرگرتنی لیستی کاندیدی لایەنەکان.

لێدوانی فەرمی: جومانە غەلای، وتەبێژی کۆمیسیۆنی باڵای سەربەخۆی هەڵبژاردنەکانی عێراق بە ئاڤا میدیای ڕاگەیاند، تا دوێنێ چوارشەممە 21ـی ئایاری 2025، لەکۆی 339 حیزبی مۆڵەتپێدراو 114 حیزبیان خواستی خۆیان بۆ بەشداریکردن لە هەڵبژاردن دەربڕیووە، ئێستاش 60 حیزبی نوێ لە قۆناغی مۆڵەتپێدان دان.

زانیاریی زیاتر: سەبارەت بە هاوپەیمانێتییەکانیش وتەبێژی کۆمیسیۆن باسی لەوەکرد، پێشتر 66 هاوپەیمانی تۆمارکراو لە کۆمیسیۆن هەبوو، لەو ژمارەیەش 18 هاوپەیمانی بۆ ئەم هەڵبژاردنە ناوی خۆیان تۆمارکردووە، ئەنجوومەنی کۆمیسیارانیش مۆڵەتی بە دوو هاوپەیمانی نوێ داوە، هاوکات 13 لیستی تاکە کەسیش تۆمارکراون.