بریکاری وەزیری گەنجینەی ئەمریکا بە پێشکەوتنەکانی هەژماری من سەرسامە

ئاڤا نیوز

 

سەرۆکوەزیران مەسرور بارزانی لەگەڵ بریکاری وەزیری گەنجینەی ئەمەریکا کۆبووە و تاوتوێی هەوڵەکانی حکومەتی هەرێمی کوردستانیان کرد بۆ چاکسازی لە بوارە جۆراوجۆرەکاندا. برادلی سمیس، سەرسامی خۆی نیشانداوە بە پێشکەوتنەکانی پڕۆژەی هەژماری من. 

 

وێنە گەورەکە: ماوەی چەند ڕۆژێکە سەرۆکوەزیران مەسرور بارزانی، بە سەردانێکی فەرمی لە واشنتنی ئەمریکایە، هەر لەوچوارچێوەیەدا چەندین دیدار و کۆبوونەوەی گرنگی ئەنجامداوە. 

ڕاگەیێنراوی فەرمی: ماڵپەڕی حکومەتی هەرێمی کوردستان بڵاویکردەوە، ئەمڕۆ پێنجشەممە، سەرۆکوەزیرانی هەرێـمی کوردستان لە واشنتن لەگەڵ برادلی سمیس، بریکاری وەزیری گەنجینەی ئەمەریکا کۆبووەوە و گفتوگۆیان لەبارەی چاکسازییەکانی حکومەتی هەرێمی کوردستان لە بواری دارایی و سیستەمی بانکی کرد.

 

ئەوەی پێویستە بیزانیت: هەر لە بڵاوکراوەکەی حکومەتی هەرێمدا هاتووە، بریکاری وەزیری گەنجینەی ئەمەریکا، سەرسامی خۆی بە پێشکەوتنەکانی پڕۆژەی (هەژماری من ) نیشاندا و هەموو پشتیوانییەکی وەزارەتەکەی بۆ پڕۆژەکە و چاکسازییەکانی حکومەتی هەرێمی کوردستان دەربڕیوە، هەروەها باسی لەوەشکردووە کە پێزانینێکی زۆریان بۆ هەوڵ و چاکسازییەکانی سەرۆکی حکومەت لە کەرتە جۆراوجۆرەکاندا هەیە، بە تایبەتی لە بواری دارایی کە دەکرێت ئەو چاکسازییانە ببنە نموونە بۆ وڵاتانی تریش.

 

لەلایەکی دیکەوە: سەرۆکوەزیران سوپاسی پشتیوانیی وەزارەتی گەنجینەی ئەمەریکای کردووە لە چاکسازییەکاندا، هاوکات پابەندبوونی حکومەتی هەرێمی کوردستانی بە چاکسازییە داراییەکان و بەدیجیتاڵیکردنی خزمەتگوزارییە گشتییەکانی دووپاتکردەوەتەوە.