وەزارەتی كاروباری شەهیدان: عێراق ڕێگری لە هەڵدانەوەی گۆڕە بەكۆمەڵەكان دەكات

ئاڤا نیوز

 

بەرپرسێکی وەزارەتی کاروباری شەهیدان و ئەنفالکراوانی هەرێمی کوردستان ئاشکرای دەکات کە عێراق ڕێگری لە هەڵدانەوەی گۆڕە بەکۆمەڵەکان دەکات، دەشڵێت، پرسەکە کراوەتە پرسێکی کەسی و ڕۆڵی هەرێمی کوردستان پەراوێز خراوە.

 

وێنە گەورەکە: لە دوای ڕووخانی ڕژێمی بەعس لە عێراق، حکومەتی هەرێمی کوردستان دەستی کرد بە هەڵدانەوەی گۆڕە بەکۆمەڵەکانی باشوور و ناوەڕاستی عێراق کە ڕووفاتی هەزارانی هاووڵاتیی کوردیان تێدایە بەڵام لە ساڵی 2019ەوە عێراق خۆی کارەکە دەکات و ڕێگرە لە بەشداریکردنی هەرێمی کوردستان، هەربۆیە ژمارەی ئەو ڕووفاتانەی کە گەڕێندراونەتەوە بەراورد بە دەیان هەزار کوردی ئەنفالکراو زۆر کەمە.

 

لێدوانی فەرمی: ئارام نووری، بەڕێوەبەری گشتیی گۆڕە بەکۆمەڵەکان لە وەزارەتی کاروباری شەهیدانی هەرێمی کوردستان بە ئاڤا میدیای ڕاگەیاند:

 

- لە ساڵی 2004ەوە بە جۆرێک لە جۆرەکان بەشدار بووین لە هەڵدانەوە و هێنانەوە و دووبارە بەخاکسپاردنەوەی ڕووفاتەکان، لە ساڵی 2004ەوە تاوەکوو 2019، نزیکەی 3659 ڕووفات گەڕێندراونەتە هەرێمی کوردستان، کە سەرجەمیان لە 57 گۆڕی بە کۆمەڵدا بوون لە 17 ناوچەی جیاواز.

 

- کۆمەڵێک هۆکار هەن بۆ کەمیی ژمارەکە، یەکێک لە هۆکارەکان ئەوەیە کە ڕۆڵ بە وەزارەتی کاروباری شەهیدان و ئەنفالکراوانی هەرێمی کوردستان نەدراوە کە  لە پرۆسەکە بەشدار بێت، عێراق ڕێگری لە هەڵدانەوەی گۆڕە بەکۆمەڵەکان دەکات. 

 

- لە ساڵی 2019ەوە تاوەکوو ئێستا پرسی گۆڕە بەکۆمەڵەکان کراوە بە پرسێکی کەسی بەڵام پرسەکە پرسێکی نیشتمانییە، وەزارەتی کاروباری شەهیدان بێبەش کراوە لە پرۆسەی هەڵدانەوەی گۆڕەکان.

 

- لە دوای ساڵی 2019ەوە سستی کەوتووەتە پەیوەندیی نێوان ئێمە و دەزگای شەهیدانی و بەڕێوەبەرایەتیی گۆڕە بە کۆمەڵەکانی عێراق دەخوازین پەیوەندییەکانمان ئاسایی ببنەوە.