لەم ساڵدا نزیکەی چوار هەزار خێزانی کورد لە شاری مەنبج ئاوارە بوون

ئاڤا نیوز

ئامارەکانی ڕوانگەی سووری بۆ مافی مرۆڤ دەریدەخات، لەم ساڵدا بەهۆی هێرشی گرووپە چەکدارەکان و سوپای تورکیا بۆ شاری مەنبج و گوندەکانی دەورووبەری نزیکەی چوار هەزار خێزانی کورد ئاوارە بوون.

وێنە گەورەکە: کۆتایی مانگی 12ـی ساڵی ڕابردوو، ڕژێمی بەشار ئەسەد ڕووخا و گرووپە چەکدارەکان و سوپای تورکیا هێرشیان بۆ چەند ناوچەیەکی باکووری ڕۆژهەڵاتی حەلەب دەستپێکرد و بەو هۆیەوە هەزاران خێزانی کورد ئاوارەبوون.

ڕاگەیێنراوی فەرمی: ئەمڕۆ هەینی ڕوانگەی سووری بۆ مافەکانی مرۆڤ ڕایگەیاند، لە کۆتاییەکانی ساڵی ڕابردوو تا ئێستا، بەهۆی هێرشی گرووپە چەکدارەکانی سووریا و سوپای تورکیا لە هێرشی "فەجرلحورییە" تەنیا لە شاری مەنبج و گوندەکانی دەورووبەری سێ هەزار و 824 خێزانی کورد ئاوارەی شارە کوردییەکانی دیکەی ڕۆژئاوای کوردستان بوون.

ئاوارەکانی مەنبج لە ڕۆژئاوای کوردستان بەمجۆرە دابەش بوون:
-    2794 خێزان ئاوارەی کۆبانێ بوون. 
-    528 خێزان ئاوارەی ڕەققە بوون.
-    219 خێزان بۆ تەبقە و مەسکەنە.
-    283 خێزان بۆ ناوچەی جەزیرە.

ئەوەی پێویستە بیزانیت: شاری مەنبج بە دووری 90 کیلۆمەتر دەکەوێتە دووری شاری حەلەب. پێش دەستپێکردنی هێرشی گرووپە چەکدارەکان ژمارەی خێزانە کوردەکان لەو شارە 18 هەزار خێزان بوو، کە ڕێژەی 30%ـی دانیشتوانی شارەکەیان پێکدەهێنا.