ڕۆیتەرز: ڕۆژئاوای كوردستان داوای ئۆتۆنۆمی لە دیمەشق دەكات

ئاڤا نیوز

بەپێی ئاژانسی ڕۆیتەرز، شاندێكی پەیەدە بەم نزیكانە سەردانی دیمەشق دەكات، بەمەبەستی گەڕێكی نوێی گفتوگۆ بۆ گەڵاڵەنامەی پرسی ئۆتۆنۆمی بۆ ڕۆژئاوای کوردستان.

وێنە گەورەكە: دوای ڕووخانی ڕژێمی پێشووی سووریا و هاتنەكایەی سیستمێكی نوێی سیاسی لە سووریا، داواكاریی كورد بۆ ئۆتۆنۆمی ناوچەیی سەریهەڵدا، بەڵام لەلایەن دەسەڵاتی نوێی دیمەشق و هاوپەیمانەكانی، لە پێش هەمووشیانەوە توركیا، بە تووندی ڕەت كرایەوە.

لێدوانی فەرمی: ئاڵدار خەلیل، ئەندامی دەستەی سەرۆکایەتیی پارتی یەکێتی دیموکرات 'پەیەدە' تایبەت بە ئاژانسی ڕۆیتەرز ئاشکرایکردووە، "بەم نزیکانە شاندێک دەنێرین بۆ دیمەشق بۆ گفتوگۆكردن لەسەر ئایندەی سیاسیی ناوچەکەمان و بەرەوپێشبردنی پرسی ئۆتۆنۆمی ناوچەیی، سەرەڕای دژایەتیی دەسەڵاتی نوێی سووریا بۆ ئەو گەڵاڵەیە."

ئەوەی پێویستە بیزانیت: میدیاكانی نزیك لە پەیەدە باس لەوە دەكەن، بەڵگەنامەی دیدگای کوردی کە سەرجەم لایەنە سیاسییەكانی ڕۆژئاوای كوردستان واژۆیان کردووە، دەبێتە بنەمای دانووستان لەگەڵ دیمەشق.