نزیکەی چوار هەزار حەجخوازی کورد گەیشتوونەتە سعوودیە

ئاڤا نیوز

پڕۆسەی گەشتی حەجخوازان بۆ خاکی سعودییە بەردەوامی هەیە، بەگوێرەی ئامارەکانی بەڕێوەبەرایەتی حەج و عومرەی کوردستان، تا ئەمڕۆ هەینی نزیکەی چوار هەزار حەجخواز بە ڕێگای وشکانی و ئاسمانی گەیشتوونەتە سعوودیە.

وێنە گەورەکە: پڕۆسەی حەجی ئەمساڵ لە ڕۆژی 16ـی 5 دەستی پێکرد، بە ڕێگای وشکانی سەدان حەجخوازی سنووری پارێزگای سلێمانی و هەڵەبجە و ئیدارەکانی گەرمیان و ڕاپەرین بەرەو خاکی سعوودیە بەڕێ کەوتن.

لێدوانی فەرمی: کاروان ستوونی، وتەبێژی بەڕێوەبەرایەتی حەج و عومرەی کوردستان بە ئاڤا میدیای ڕاگەیاند، تا ئەمڕۆ هەینی سێ هەزار و 398 حەجخواز گەیشتوونەتە سعوودیە، هەزار و 664 کەسیان بەڕێگای وشکانی و هەزار و 734 کەسیان بە فڕۆکە گەشتییان کردووە. لەوانەی گەیشتوون دوو هەزار و 447 کەسیان گەیشتوونەتە شاری مەککە و 951 حەجخوازی دیکە بەیانی بەڕێ دەکەون.

زانیاریی زیاتر: بەوتەی کاروانی ستوونی، هێشتا هەزار و 728 حەجخوازی دیکە ماون لە کوردستانەوە بگەن و تا 28ـی مانگ هەموویان دەگەن. تا ئەمڕۆ هیچ حاڵەتێکی داخڵ بوون بۆ نەخۆشخانە ڕووینەداوە، تەنیا چەند حاڵەتێکی تەشەنوج و سک ئێشە هەبووە و تیمە تەندروستییەکان چارەسەرییان کردوون.