ڕاگەیێنراوی وەزارەتی دەرەوەی ئەمریکا لەبارەی کۆبوونەوەی مەسرور بارزانی و مارکۆ ڕۆبیۆ

ئاڤا نیوز

 

 وتەبێژی وەزارەتی دەرەوەی ئەمریکا دوای کۆبوونەوەی سەرۆکوەزیران مەسرور بارزانی و مارکۆ ڕوبیۆ وەزیری دەرەوەی ئەمریکا ڕایگەیاند, وەزیری دەرەوەی ئەمریکا بە مەسرور بارزانی راگەیاندووە کە کوردستانێکی بەهێز و خۆڕاگر بناغە و پایەی پەیوەندییەکانی ئەمریکا و عێراقە

 

 وێنە گەورەکە: دوای ئەنجامدانی دەیان دیداری دیپلۆماسی و سەرپەرشتیکردنی دوو گرێبەستی گرنگ بە بەهای 110 ملیار دۆلار لەنێوان ئەمریکا و هەرێمی کوردستان، ڕۆژی هەینی ڕێککەوتی 23ـی 5ـی 2025، سەرۆکوەزیرانی مەسرور بارزانی لەگەڵ مارکۆ ڕوبیۆ، وەزیری دەرەوەی ئەمریکا کۆبووەوە.

 

بڵاوکراوەی فەرمی:  وتەبێژی وەزارەتی دەرەوەی ئەمریکا ڕایگەیاند: وەزیری دەرەوەی ئەمریکا بە مەسرور بارزانی راگەیاندووە کە کوردستانێکی بەهێز و خۆڕاگر بناغە و پایەی پەیوەندییەکانی ئەمریکا و عێراقە.

 

وەزیری دەرەوەی ئەمریکا دەستخۆشی لە سەرۆکوەزیران مەسرور بارزانی کرد بۆ ئەنجامدانی گرێبەستەکان لەگەڵ کۆمپانیاکانی ئەمریکا بۆ فراوانکردنی بەرهەمهێنانی غازی سرووشتی لە هەرێمی کوردستان، کە ئەو گرێبەستانە یارمەتیدەری عێراق دەبێت بەرەو سەربەخۆیی وزە.

 وەزیری دەرەوە و سەرۆکوەزیران باسیان لە بەرژەوەندیی هاوبەشیان کرد لە پاراستنی مافی پێکهاتە ئایینی و نەتەوەییەکان لە عێراق و سووریا.  

وەزیری دەرەوە پشتگیری ئەمریکای دووپاتکردەوە و وتی، کوردستانێکی بەهێز و خۆڕاگر بناغە و پایەی پەیوەندییەکانی ئەمریکا و عێراقە.

 

لەلایەکی دیکە: سەرۆکوەزیران مەسرور بارزانی دوای کۆبوونەوەکەی لەگەڵ مارکۆ ڕوبیۆ، وەزیری دەرەوەی ئەمریکا بە ڕۆژنامەنووسانی ڕاگەیاند، کۆبوونەوەیەکی سەرکەوتوومان لەگەڵ وەزیری دەرەوەی ئەمریکا هەبوو، دیدگای هەرێمی کوردستانمان گەیاندە ئەمریکا.

زانیاریی زیاتر: سەرۆکوەزیران مەسرور بارزانی گوتیشی، پشتیوانییەکی زۆر لە ئەمریکاوە بۆ کوردستان هەیە، وە داوامان لە مارکۆ ڕوبیۆ کردووە سەردانی هەرێمی کوردستان بکات.

لەبارەی کردنەوەی گەورەترین کونسوڵخانەی ئەمریکا لە شاری هەولێر، سەرۆکوەزیران مەسرور بارزانی گوتی، کردنەوەی کۆنسوڵخانەی ئەمریکا ڕەنگدانەوەیەکی ئەرێنی لەسەر کوردستان دەبێت.