شەڕ و ئاڵۆزی لە کۆنفرانسی بزووتنەوەی گۆڕان دروست بوو

ئاڤا نیوز

لە کۆنفرانسی ئەمڕۆی هەردوو باڵەکەی بزوتنەوەی گۆڕان [گردی زەرگەتە و گەڕەکی کوردسات] گرژی دروست بوو، کۆمیسیۆن بەشێوەیەکی کاتیی کارەکانی ڕاگرت و ژمارەیەک لایەنگری گۆڕان هەوڵیاندا بچنە ناو هۆڵەکە و پۆلیس ڕێگری لێ کردن.

 

وێنە گەورەكە: ئەمڕۆ شەممە 24-5-2025، كۆنفڕانسی نیشتمانیی هاوبەشی دوو ئاراستە جیاوازەكەی گۆڕان لە شاری سلێمانی بەڕێوەدەچێت، تەنیا 1200 كەس بۆیان هەیە بەشداریی لە كۆنفرانسەكە بكەن و ئەمڕۆ دوا وادەیە بۆ یەكلاكردنەوەی ئەو گرفتەی لەنێوان هەردوو باڵەکە هەیە.

زانیاریی پەیامنێر: چۆمان مەحموود، پەیامنێری ئاڤا نیوز لەبەردەم هۆڵی کۆنفراس ڕایگەیاند، لە کاتی بەڕێوەچوونی کۆنفرانسی بزووتەوەی گۆڕان لەنێوان باڵی گردەکە و باڵی کوردسات شەڕ و ئاڵۆزی دروست بوو، بەڵام پۆلیس بە داری کارەبایی لەیەکی جیا کردنەوە. (لەمکاتە لایەنگرانی بزووتنەوەی گۆڕان پەلاماری پەیامنێری ئاڤا دەدەن و بۆ ماوەیەک ڕووماڵکردنی ڕادەگرن).
 
زانیاریی زیاتر: چۆمان مەحمود دەڵێت: هەردوو باڵەکە یەکدی بە لادان لە دەستوور و ڕێبازی نەوشیروان مستەفا تۆمەتبار دەکەن. باڵی کوردسات دەیەوێت گۆڕانکاری لە پەیڕەو بکات و ناوی ڕێکخەر بۆ سەرکردە بگۆڕێت.

ئەوەی پێویستە بیزانیت: ژمارەی لایەنگرانی گۆڕانی کوردسات لە کۆنفرانسەکە لە لایەنگرانی گۆڕانی گردەکە زیاترە، بە جۆرێک ژمارەیان زیاتر لە 500 کەسە، هەرچی گۆڕانی گردەکەیە  ژمارەیان 360 بۆ 370 کەسە.