چوارچێوەی هەماهەنگی داوا لە پارتی و یەکێتی دەکات لە ماوەی 48 کاتژمێردا ڕێکبکەون

ئاڤا نیوز

چوارچێوەی هەماهەنگی مۆڵەتی 48 کاتژمێر دەداتە پارتی و یەکێتی بۆ ئەوەی لەسەر کاندیدی سەرۆککۆمار ڕێکبکەون و کۆتایی بە بنبەستی سیاسی بهێنن.

چیرۆکی سەرەکی: بەگوێرەی وتەی وتەبێژی هاوپەیمانیی نەسر، چوارچێوەی هەماهەنگیی شیعەکان ماوەی 48 کاتژمێری داوەتە پارتی دیموکراتی کوردستان و یەکێتیی نیشتمانیی کوردستان بۆ ڕێککەوتن لەبارەی پۆستی سەرۆککۆمار. عەقیل ڕدینی ئاماژەی بەوە کردووە کە کۆبوونەوەکانی شاندەکەی چوارچێوەی هەماهەنگی لەگەڵ سەرکردایەتیی کورد ئەرێنی بوون و لایەنی کوردیش دەیەوێت کۆتایی بەم دۆخە بهێنێت.

لێدوانی فەرمی: عەقیل ڕدینی، وتەبێژی هاوپەیمانیی نەسر بە ڕۆژنامەی "سەباح"ـی ڕاگەیاندووە: چوارچێوەی هەماهەنگی وادەی 2 ڕۆژی داوەتە لایەنە کوردستانییەکان بۆ چارەسەرکردنی ئەم بنبەستە و گەیشتن بە ڕێککەوتن دەربارەی هەڵبژاردنی سەرۆککۆمار.

زانیاریی زیاتر: ڕۆژنامەی سەباح لەسەر زاری چەند سەرچاوەیەکی ئاگادارەوە بڵاوی کردووەتەوە، ڕێککەوتنێک کراوە لەسەر دانانی چەند بنەمایەک بۆ سازانی نێوان پارتی و یەکێتی سەبارەت بە میکانیزمی هەڵبژاردنی سەرۆککۆمار، کە یارمەتیدەر دەبێت بۆ دوورکەوتنەوە لە هەر قەیرانێکی سیاسی و دڵنیابوون لە ڕێزگرتن لە وادە دەستوورییەکان.

باکگراوند: دوێنێ دووشەممە 2-2-2026، شاندێكی باڵای شیعەکان كە پێكهاتبوو لە محەممەد شیاع سودانی، هادی عامری، موحسین مەندەلاوی و عەباس ڕازی، سەردانی هەولێر و سلێمانییان کرد و لەگەڵ بەرپرسانی باڵای هەرێمی کوردستان کۆبوونەوە بۆ پرسی پێکهێنانی حکومەتی داهاتوو و یەکلاکردنەوەی پۆستی سەرۆککۆماری عێراق.