وەزارەتی پەروەردە ڕوونکردنەوە لەبارەی بەکارهێنانی ئەپڵیکەیشنی وەرگرتنەوەی ئەنجامەکان دەدات

ئاڤا نیوز

 

ئەمڕۆ وەزارەتی پەروەردە ئەنجامی پۆلەکانی بازنەی یەکەمی خوێندنی ڕاگەیاند، بەڵام لەبارەی بەکارهێنانی ئەپڵیکەیشنێکەوە ڕوونکردنەوە بە دایک و باوکی قوتابیان دەدرێت، داوا دەکرێت ئەپدەیتی ئەپڵیکەیشنەکە بکەنەوە، چونکە قوتابیانی هەموو قۆناغەکان لەو ئەپە ئەنجامەکان وەردەگرنەوە.

 

وێنە گەورەکە: ماوەی چەند ساڵێکە وەزارەتی پەروەردەی حکومەتی هەرێمی کوردستان سەرجەم سیستمەکانی مامەڵەکردن و کاروباری قوتابخانەکانی کردووە بە ئەلیکترۆنی. قوتابیان دەتوانن ئەنجامەکانیان لە ئەپڵیکەیشنێک وەرگرنەوە بەناوی (ئی هەڵسەنگاندن ).

ڕاگەیێنراوی فەرمی: وەزارەتی پەروەردە ڕایگەیاندووە، هەموو پۆلەکانی خوێندن بە نۆی بنەڕەتی و 12ـی ئامادەییەوە ئەنجامەکانیان لە ئەپڵیکەیشنی (ئی هەڵسەنگاندن (e-halsangandn – وەردەگرنەوە. لە ئەپڵیکەیشنەکە بە دووجۆر نمرەکان بەردەستن، وەک کارتی قوتابخانە یان وەک نمرەی تۆمارکراوی دیجیتاڵی، بەڵام ئەوەی لەسەر بەکارهێنەرە پێویستە ئەپڵیکەیشنەکە ئەپدەیت بکاتەوە و دواین ڤێرژن یان وەشان بەکاربهێنێت.

 

ئەوەی پێویستە بیزانیت: وەزارەتی پەروەردە دەڵێت: کۆدی بەکارهێنەر و وشەی نهێنی پێویستە لە قوتابخانە وەربگریتەوە، ئەگەر کۆد و وشەی نهێنیت وەرنەگرتووە و کارتی ساڵانی پێشووتان ماوە چەند ژمارەیەکی لەسەر نوسراوە، وەک ژمارەی سریاڵ ئەوە بەکاربهێنە بۆ کۆدی بەکارهێنەر و ڕۆژ و مانگ و ساڵی لە دایکبوونی قوتابییەکە دەبێتە وشەی نهێنی، بەنمونە قوتابییەک لە 1-6-2019 لە دایک بووبێت وشەی نهێنییەکە بەمجۆرەی لێ دێت 01062019 ئەمە دەبێتە وشەی نهێنی .