یاسای هەڵبژاردن هەموار دەکرێتەوە

ئاڤا نیوز

 

لەسەر داوای چەند لایەنێکی سیاسی، هەموارکردنەوەی یاسای هەڵبژاردنەکان لەدوای کۆتاییهاتنی خولی یاسادانانی ئێستا دووبارە دەخرێتە بەردەم پەرلەمان، پەرلەمانتارێکی شیعەش دەڵێت، "گۆڕانکاریی بنەڕەتی بۆ دەکەن".

 

وێنە گەورەکە: بڕیارە 11-11-2025، هەڵبژاردنی خولی شەشەمی پەرلەمانی عێراق بەڕێوەبچێت، کۆمیسیۆنی باڵای هەڵبژاردنەکانیش لە ئامادەکارییەکانی بەردەوامە، لە سبەی یەکشەممەوە 25-5-2025 دەست بە وەرگرتنی لیستی کاندیدان "لیستی کراوە و تاک" دەکات.

لێدوانی فەرمی: سائیر موخیف، پەرلەمانتاری عێراق ڕایگەیاند: لەدوای کۆتاییهاتنی خولی یاسادانانی ئێستا، پرسی هەمواری یاسای هەڵبژاردن لە پەرلەمان دەخرێتەڕوو، بەئەگەڕێکی زۆریش گۆڕانکاریی بنەڕەتی لێدەکرێت.

 

زانیاریی زیاتر: ئەو پەرلەمانتارە ئاماژەی بەوەشکرد، هەموارکردنەوەکە سێ بۆ چوار خاڵی سەرەکی لەخۆدەگرێت، دیارترینیان: قەدەغەکردنی بەکارهێنانی پۆستی حکومی و سەرچاوەکانی دەوڵەت و وەزارەت لە کاتی بانگەشەی هەڵبژاردن، هەروەها پشتگیریکردنی لیستە بچووکەکان بۆ ئەوەی بتوانن بە شێوەیەکی فراوانتر ڕکابەری لیستەکانی دیکە بکەن.

 

لەلایەکی دیکەوە: بەپێی چەند سەرچاوەیەکی سیاسی عێراق، ئاراستەی محەممەد شیاع سوودانی، سەرۆکوەزیرانی عێراق لەگەڵ هەڵبژاردنەکەن لە وادەی دیاریکراوی خۆیدا، بەڵام پێداگری لەسەر ئەو وادەیە ڕەنگە قورس بێت، بەتایبەتیش کە مانگی داهاتوو وەرزی یاسادانانی پەرلەمان دەستپێدەکاتەوە و لەوانەیە ئاراستەی مالیکی هەوڵی تێپەڕاندنی هەمواری یاسای هەڵبژاردن بدات.