عێراق و تورکیا لەسەر ئاو ڕێککەوتن

ئاڤا نیوز

وەزیری سامانەکانی ئاوی عێراق ئاشکرای کرد، لەگەڵ تورکیا ڕێککەوتوون لەبارەی بەردانەوەی 500 مەتر سێجا ئاو لە چرکەیەکدا ڕۆژانە، هاوکات وتیشی: بەشێک لە بەنداوەکان بە ملیارەها لیتر ئاوی گڵدراویان کەمە.

وێنە گەورەکە: بەگوێرەی ڕاپۆرتە نێودەوڵەتییەکان عێراق یەکێکە لە زەرەرمەندترین وڵاتان لەڕووی گۆڕانی ئاو هەواوە، بەو هۆیەوە ڕووبەڕوووی قەیرانی کەمیی ئاو بووەتەوە و بە وتەی بەرپرسانی حکومەت ئەمساڵ عێراق بە هاوینێکی سەخت تێدەپەڕێت و کەمترین بڕی ئاوی گڵدراوی لە مێژووی خۆیدا تۆمار کردووە.

لێدوانی فەرمی: عۆن زیاب عەبدوڵڵا، وەزیری سامانەکانی ئاو لە کۆنفڕانسێکی ڕۆژنامەوانی ڕایگەیاند: عێراق و توركیا ڕێككەوتوون لەسەر ئەوەی تورکیا ڕۆژانە 500 مەتر سێجا ئاو لە چرکەیەکەدا لە ڕووباری فوراتەوە بەربداتەوە، ئاماژەی بەوەشكرد لیژنە هاوبەشەكان لەگەڵ ئێران و توركیا بەردەوامن لە كاركردن بۆ دەستەبەركردنی پشكی ئاوی عێراق.

زانیاریی زیاتر: بە وتەی عۆن، عێراق پێویستیی بە دروستكردنی بەنداوی گڵدانەوەی ئاو نییە، بۆشایی گڵدانی گەورە لە بەنداوەكان هەیە، بە نزیكەی حەوت ملیار لیتری زیادە لە بەنداوی موسڵ، چوار ملیار لیتر لە بەنداوی سەرسار، و هەشت ملیار لیتری زیادە لە بەنداوی حەدیسە مەزەندە دەكرێن.

لەلایەکی دیکەوە: پێشتر خالید شیمال، وتەبێژی وەزارەتی سامانە سرووشتییەکانی عێراق ڕاگەیاندبوو کە هاوینی 2025 سەخترین و ماندووکەرترین هاوین دەبێت بۆ عێراق، چونکە بە درێژایی مێژووی دەوڵەتی عێراق کەمترین ئاوی گڵدراوی هەیە لە ئێستادا.

بە وتەی ئەو بەرپرسە، 70% سەرچاوەی ئاوی عێراق لە تورکیا و سووریا و ئێرانەوەیە، بەڵام کەمتر لە 40%ـی ئەو بڕە ئاوەی بۆ دێت.