چەند بڕیارێکی نوێ لە وەزارەتی پەروەردەوە بۆ قوتابییانی پۆلی 12

ئاڤا نیوز

 

بەپێی نووسراوێکی نوێی وەزارەتی پەروەردە بۆ لەمەودوا دیاریکردنی پلەبەندی لەنێوان قوتابییانی دەرچووی پۆلی 12ی ئامادەیی نەما و قوتابییان کۆنمرەکەیان هەرچەند بێت ناخرێنە ڕیزبەندی پلەکانی یەکەم و دووەم و سێهەم لەسەر ئاستی پەروەردەکان و هەڵسەنگاندن تەنیا ئاستی قوتابخانە و مامۆستایان دەکرێت.

 

وێنە گەورەکە: ساڵانە لە هەرێمی کوردستان، دوای ڕاگەیاندنی ئەنجامی تاقیکردنەوەکانی پۆلی 12ی ئامادەیی پلەبەندی قوتابییانی دەرچوو لەسەر بنەمای یەکەم و دووەم و سێهەم لەسەر ئاستی کوردستان دیاریدەکرا، لە مەراسیمی تایبەتدا ناوەکان ڕادەگەیێنرا و خەلاتی یەکەمەکانیش دەکرا، بەپێی ئەم بڕیارە نوێیە ئەو هەڵسەنگاندنە نەما و بۆ لەمەودوا هیچ مەراسیمێک سازناکرێت و ئەنجامەکانیش بە ئەلیکترۆنی ڕادەگەیێنرێت.

 

نووسراوی فەرمی: بەپێی نووسراوی لیژنەی باڵای هەمیشەیی تاقیکردنەوە گشتییەکانی هەرێمی کوردستان، کە وەک بڕیار ئاڕاستەی سەرجەم بەڕێوەبەرایەتییە گشتییەکانی پەروەردەی کردووە دەبێت بۆ ساڵی خوێندنی 2024 - 2025 ڕەچاوی ئەم خاڵانە بکرێت.

- بۆ ڕاگەیاندنی ئەنجامەکانی پۆلی 12ـی ئامادەیی بە هەموو بەشەکانییەوە، هیچ کۆنگرەیەکی ڕۆژنامەوانی ناکرێت، وەزارەتی پەروەردە بە ڕێگەی دیجیتاڵی نمرەی قوتابییان ڕادەگەیێنێت.

- هیچ پلەبەندییەکان ڕاناگەیێنرێت لە نێوان قوتابییان و هیچ پێوەرێک لەسەر ئاستی تاک، بۆ ناساندنی ئاستەکانی (یەکەم، دووەم و سێیەم) دیاریناکرێت، بڕیارەکەش دەبێت سەرجەم قوتابخانە و پەروەردەکان پێوەی پابەندبن.

- لەسەر بنەمای ئەو خاڵەش هیچ مەراسیمێکی خەڵات بەخشین و ڕێزلێنان بۆ قوتابییان ڕێکناخرێت نە لەلایەن وەزارەتی پەروەردە و نە لەلایەن پەروەردەی شار و پارێزگاکان.

 

زانیاریی زیاتر: وەزارەتی پەروەردە ڕاشیگەیاندووە، لادان لەو یاسا و ڕێنماییە نوێیانە سزا و لێپێچینەوەی کارگێڕی لەسەرە.

 

گۆشەیەکی دیکەی دیمەنەکە: وەزارەتی پەروەردە ڕاشیگەیاندووە، بنەماکانی هەڵسەنگاندن دەگۆڕیت و بنەمای زانستیانەتر دەگیرێتە بەر، بۆ لەمەودوا هەڵسەنگاندن بۆ ئاستی قوتابخانە و مامۆستایان دەکرێت و بۆ ئەوەش لەدوای ڕاگەیاندنی ئەنجامی خولی دووەم لەسەر بنەمای کۆنمرە و ڕێژەی دەرچوون ئاستی قوتابخانە و مامۆستایان دیاریدەکرێت.