بەرپرسێکی پارتی لە شنگال: هاوپەیمانێتی یەکێتی لە نەینەوا دەنگی کورد پەرت دەکات

ئاڤا نیوز

دروستکردنی هاوپەیمانی لەلایەن یەکێتییەوە لەگەڵ لایەنە عەرەبەکان لە نەینەوا، کاردانەوەی بە دوای خۆیدا هێنا و بەرپرسێکی پارتی لەو سنوورە پێیوایە کە کاریگەری لەسەر پەرتبوون و کەمبوونەوەی دەنگەکانی کورد دەبێت.

وێنە گەورەکە: بڕیارە 2025-11-11، هەڵبژاردنی خولی شەشەمی ئەنجوومەنی نوێنەرانی عێراق بەڕێوەبچێت. بەگوێرەی ئامارەکانی کۆمیسیۆنی باڵای سەربەخۆی هەڵبژاردنەکان، تاوەکو ئێستا 118 پارتی سیاسیی، 25 هاوپەیمانێتی، کە پێنجیان هاوپەیمانێتیان پەسەند کراوە، هەروەها 11 هاوپەیمانێتی چاوەڕوانی بڕیاری پەسەندکردنن و 16 لیستی تاکە کەسیش تۆمار کراون.

لێدوانی فەرمی: نازم کەبیر، بەرپرسی لقی 17ـی پارتی لە شنگال، بە ئاڤا میدیای ڕاگەیاند: پارتی لە نەینەوا هاوپەیمانێتی نییە و بە لیستێک بەشداری دەکات، هەرچەندە پێشتر هەوڵماندا هەموو لایەنە کوردستانییەکان بە یەک لیست لە ناوچە کوردستانییەکانی دەرەوەی ئیدارەی هەرێم بەشداری هەڵبژاردن بکەن، بەڵام دیاربوو هەر لایەنێک ئەجێندای خۆی هەبوو بۆیە هەوڵەکە سەرکەوتوو نەبوو.

ئەو بەرپرسەی پارتی دەڵێت: هاوپەیمانێتی یەکێتی نیشتمانی لەسنووری نەینەوا، کاریگەری لەسەر پەرتبوون و بزربوونی دەنگەکانی کورد لەو سنوورە دەبێت.

زانیاریی زیاتر: لە هەڵبژاردنی ئەنجوومەنی  پارێزگاکان، پارتی 142 هەزار دەنگی لە نەینەوا بەدەستهێنا، سەرەڕای چەندین تێبینی لەسەر پرۆسەی هەڵبژاردنەکە و یاسای هەڵبژاردنەکە، توانی لە کۆی 26 کورسی چوار کورسی بەدەستبهێنێت.

ئەوەی پێویستە بیزانیت: یەکێتیی نیشتمانیی کوردستان، لە نەینەوا لەگەڵ هەریەک لە، حیزبی مەسیری نیشتمانی، بە سەرۆکایەتی ئەنجام عەلی عومەر و حیزبی ڕەفعەی نیشتمانی، بە سەرۆکایەتی ڕافع سالم ئەحمەد. هاوپەیمانیەتی بەستووە.