سەعدی پیرە: کورد لە نەینەوا زۆرینە نییە دەبێ لەگەڵ لایەنی دیکە هاوپەیمانێتی بکات

ئاڤا نیوز

یەکێتی نیشتمانی کوردستان لەگەڵ دوو لایەنی عەرەبی لە نەینەوا هاوپەیمانێتی کردووە، ئەندامێکی مەکتەبی سیاسی حزبەکەش دەڵێت، هاوپەیمانێتییەکە نابێتە هۆی پەرتکردنی دەنگی کورد.

وێنە گەورەکە: بڕیارە 2025-11-11، هەڵبژاردنی ئەنجوومەنی نوێنەرانی عێراق بەڕێوەبچێت، یەکێتی نیشتمانی کوردستانیش لەگەڵ حیزبی مەسیری نیشتمانی، بە سەرۆکایەتی ئەنجام عەلی عومەر و حیزبی ڕەفعەی نیشتمانی، بە سەرۆکایەتی ڕافع سالم ئەحمەد هاوپەیمانێتی بۆ هەڵبژاردنەکە پێکهێناوە.

لێدوانی فەرمی: سەعدی ئەحمەد پیرە، ئەندامی مەکتەبی سیاسی یەکێتی نیشتمانی کوردستان بە ئاڤا میدیای ڕاگەیاند: "لەگەڵ دوو حزبی پێشکەوتووخوازی عەرەبی هاوپەیمانێتیمان لە نەینەوا کردووە، پێموایە حزبە کوردییەکانی دیکەش هەوڵ بۆ ئەم هاوپەیمانێتیە بدەن بە ئاراستەی پێکەوە کارکردن، لە قازانجی کورد دەبێت".

زانیاریی زیاتر: بە گوتەی سەعدی پیرە، ئەم هاوپەیمانێتیەی ئەوان نابێتە هۆی پەرتکردنی دەنگی کورد، بەپێچەوانەوە ئەوانە بەرەو لیستی یەکێتی دێن هیچ نەبێت هەڵوێستی نەرێنیان بەرامبەر بە پرسی کورد نابێت، چونکە کورد لە مووسڵ زۆرینە نییە، بۆیە دەبێت کورد هاوپەیمانێتی بەهێزی لە مووسڵ هەبێت و ئەمەش پێگەی کورد بەهێزتر دەکات.