پلاندانانی عێراق وادەی ڕاگەیاندنی ئەنجامی "وردەکاری و بنەڕەتی" سەرژمێری ئاشکرا دەکات

ئاڤا نیوز

وتەبێژی وەزارەتی پلاندانانی عێراق ڕایدەگەیێنێت، کاری تیم و لیژنە تایبەتەکان بۆ تەواوکردنی ئەنجامە بنەڕەتییەکانی سەرژمێری گشتی دانیشتووان و نیشتەجێبوون لەعێراق بەردەوامە و لە ماوەیەکی کەمی داهاتوو ئەنجامەکانی ئاشکرا دەکرێت.

چیرۆکی سەرەکی: دوای 37 ساڵ ڕۆژی 24ـی شوباتی 2025، ئەنجامی سەرژمێریی گشتی دانیشتووان لە عێراق و هەرێمی کوردستان ڕاگەیێنرا و بەگوێرەی ئەنجامەکانی سەرژمێری، ژمارەی دانیشتووان لە عێراق گەیشتە 46 ملیۆن و 118 هەزار کەس و 793 کەس، ژمارەی دانیشتووان لە هەرێمی کوردستانیش زیاتر لە 6 ملیۆن  600 هەزار کەس دەبێت.

لێدوانی فەرمی: عەبدولزەهرە ئەلهینداوی، وتەبێژی وەزارەتی پلاندانانی عێراق بە ئاڤا میدیای ڕاگەیاند، تیمەکان و لیژنە تایبەتەکان لە وەزارەتی پلاندانان بە دوو شەفتی (بەیانیان و ئێواران) کار لەسەر تەواوکردنی ئەنجامە بنەڕەتییەکانی سەرژمێری گشتی دانیشتووان و نیشتەجێبوون دەکەن بۆ ئەوەی داتابەیسێکی یەکخراو هەبێت سەبارەت بە ژیانی هاووڵاتیان و ئاستی ئەو خزمەتگوزارییانەی پێشکەشیان دەکرێت و ئەوەی لە هاووڵاتیان و ناوچەکاندا کەموکورتی هەیە، هەروەها کۆدکردن بۆ ناوچەکان و هاووڵاتیان و تەنانەت پیشە جیاوازەکانیش زیاد بکرێت."

ئەوەی پێشبینی دەکرێت: بە وتەی هینداوی پێشبینی دەکرێت لە ماوەیەکی کەمی داهاتوو ئەنجامی وردەکاری و بنەڕەتییەکانی سەرژمێری گشتی دانیشتووان و نیشتەجێبوون ڕابگەیێنرێت، بۆ ئەوەی وێنەیەکی تەواو لە بارودۆخی عێراقمان لەبەردەمدا بێت لەسەر ئاستی خزمەتگوزارییە جۆراوجۆرەکان و هەروەها سەرژمێری خەڵک و باڵەخانە و وردەکارییەکانی دیکەی گەشەپێدان کە ئامانجی سەرژمێرییەکە بووە.