هەسەدە و حکومەتی سووریا لەبارەی کەمپی هۆل ڕێککەوتن

ئاڤا نیوز

ئیدارەی سەربەخۆی ڕۆژئاوای کوردستان سەبارەت بە گەڕاندنەوەی خێزان  و منداڵانی چەکدارانی داعش کە بە ڕەچەڵەک سوورین، لە کەمپی هۆلەوە بۆ زێدی خۆیان لەگەڵ  ئیدارەی نوێی حکومەتی سووریا گەیشتە ڕێكکەوتن.

 

لێدوانی فەرمی: شێخمووس ئەحمەد، سەرۆکی نووسینگەی کاروباری ئاوارە و پەنابەران لە ئیدارەی سەربەخۆی ڕۆژئاوای کوردستان ڕایگەیاند: ڕێککەوتنەکە بریتی بوو لە دانانی میکانیزمێکی هاوبەش بۆ گەڕاندنەوەی خێزان و منداڵانی چەکدارانی داعش کە بەڕەچەڵەک سوورین لە کەمپی هۆلەوە بۆ ناوچەکانیان لە ناوخۆی سووریا.

 

ئاماژەی بەوەش کرد، ڕێککەوتنەکە دوای کۆبوونەوەیەکی سێ قۆڵی دێت کە ڕۆژی دووشەممە لە کەمپی هۆل لەنێوان شاندێکی حکومەتی سووریا و شاندێکی دیکەی هاوپەیمانیی نێودەوڵەتی و نوێنەرانی ئیدارەی سەربەخۆی ڕۆژئاوا بەڕێوەچوو.

 

ئەوەی پێویستە بیزانیت: کەمپی هۆل لەژێر کۆنترۆڵی هێزەکانی سووریای دیموکرات(هەسەدە)دایە، دەکەوێتە باشووری شاری هۆل لە پارێزگای حەسەکە و نزیک سنووری عێراق کە خێزان و منداڵانی ئەندامانی داعشی تێدایە.

 

ئەمەش بزانە: نزیکەی 43 هەزار کەس کە پێکدێن لە ژن و منداڵی ئەندامانی داعش لەو کەمپە کۆکراونەتەوە کە خەڵکی چەندین وڵاتن. لەو ژمارەیەش 18 هەزاریان خەڵکی عێراقن.