میدیاکانی ئیسرائیل: ترەمپ و نەتەنیاهۆ لەبارەی ئێران بووەتە دەمەقاڵێیان

ئاڤا نیوز

 

کەناڵی 12ـی ئیسرائیلی ئاشکرای دەکات، دۆناڵد ترەمپ، سەرۆکی ئەمریکا و بنیامین نەتانیاهۆ، سەرۆکوەزیرانی ئیسرائیل لە پەیوەندییەکی تەلەفۆنیدا لەسەر پرسی بەرنامەی ئەتۆمیی ئێران و چۆنێتی مامەڵەکردن لەگەڵ ئەو وڵاتە دەبێتە دەمەقاڵێیان.

 

زانیاریی بەدەستهاتوو: بەگوێرەی کەناڵی 12ـی ئیسرائیلی، لەمیانی پەیوەندییە تەلەفۆنییەکە، ترەمپ بە نەتانیاهۆی ڕاگەیاندووە: "دەمەوێت بەڕێگەی دیپلۆماسی لەگەڵ ئێران بگەینە ڕێککەوتن و بڕوام بە تواناکانم هەیە ئەوە بکەین، چونکە ئەمە لە بەرژەوەندیی هەموولایەکە". بەڵام نەتانیاهۆ ئەمەی بەدڵ نەبووە و بیرۆکەی هێرشی سەربازی بۆ سەر ئێران بە بژاردەیەکی باشتر زانیووە.

 

زانیاریی زیاتر: ترەمپ دانوستاندنە ئەتۆمییە بەردەوامەکانی وڵاتەکەی لەگەڵ ئێران بە ئەرێنی وەسف دەکات و پێشبینیشی کردووە کە ڕەنگە مژدەیەکی خۆش لەم ڕۆژانەدا ڕابگەیێندرێت،  ئێرانیش ڕاگرتنی پیتاندنی یۆرانیۆم وەک هێڵی سوور ناو دەبات.

 

لەلایەکی دیکە: ئەم پێشهاتە لە کاتێکدایە، ترەمپ، کریستی نۆوم،  وەزیری ئاسایشی ناوخۆی وڵاتەکەی ناردە ئیسرائیل و لەگەڵ نەتانیاهۆ کۆبوویەوە، لەمیانی کۆبوونەوەکەش پرسی دانوستاندنەکانی واشنتن و تارانیان تاوتوێ کردووە.