پەکەکە مەرجی خۆی بۆ دانانی چەک ئاشکرا دەکات

ئاڤا نیوز

هاوسەرۆکی دەستەی بەڕێوەبەری کەجەکە ڕایگەیاند، تا ئۆجەلان ئازاد نەکرێت پەکەکە چەک دانانێت، ئاماژە بۆ ئەوەش دەکات تەنیا خودی ئاپۆ دەتوانێت چەک لە دەستی شەڕڤانان و گەریلاکان وەرگرێت.

 

وێنە گەورەکە: لە دوای ڕاگەیاندنی بڕیاری خۆهەڵوەشاندنەوە و چەکدانانی پەکەکە، تورکیا پێشوازی لەم بڕیارە کرد و بە دەستپێکردنی قۆناغێکی نوێی لە تورکیا داینا، بەڵام لەگەڵ ئەوەش بەردەوامی ئۆپەراسیۆنە سەربازییەکانی دژی ئەو ڕێکخراوە دووپاتکردەوە، "تاوەکو دڵنیابوونیان لە جێبەجێکردنی بڕیاری چەکدانانی پەکەکە".

 

لێدوانی ڕۆژنامەوانی: بەسێ هۆزات، هاوسەرۆکی دەستەی بەڕێوەبەری کەجەکە، لە چاوپێکەوتنێکی تەلەفیزیۆنیدا، ڕایگەیاند: دوای کۆنگرە چووینە پرۆسەیەکی زۆر گرنگ و مێژووییەوە، بە ڕوونی دەیڵێین؛ تەنیا خودی ئاپۆ دەتوانێت چەک لە دەستی شەڕڤانان وەرگرێت، ئەمەش تەنیا بە ئازادیی جەستەیی ڕێبەر ئاپۆ دەبێت.

 

بە وتەی بەسێ هۆزات، ئەوان لە پرۆسەیەکی ڕژددان و دەڵێت: تورکیا بە گشتی دەگۆڕێت، گۆڕانەکە بە تەنیا بۆ کورد نییە، ئەمە بەمانای پرۆسەیەکی گۆڕین و گۆڕانکاری تەواوی تورکیا دێت، بە مانای دیموکراتیزەکردنی تورکیا دێت.

 

بەسێ هۆزات ئاماژە بە بەردەوامی هێرشەکانی سوپای توركیا دەکات و دەشڵێت: ئەمە ئەوە نیشان دەدات کە پێداگری لەسەر شەڕ هەیە، تا ئەو هێرشانە بەردەوام بن، بەدڵنیاییەوە گەریلا وەڵام دەدەنەوە وەک مافێکی ڕەوا بۆ پاراستنی خۆیان.

 

ئەوە مانایەی دەیگەیێنێت: هاوسەرۆکی دەستەی بەڕێوەبەری کەجەکە بە پێویستی دەزانێت گۆڕانکاری لەبەشێک لە یاساکان بکرێت و مەرجەکانی کارکردنی ئازادانەی ئۆجەلان فەراهام بکرێت و دەشڵێت: ئەگەر ئۆجەلان بە ئازادانە ئەم پرۆسەیە بەڕێوە نەبات، بڕیاری هەڵوەشاندنەوەی پەکەکە و کۆتاییهێنان بە خەباتی چەکداری نابێتە شتێکی کردەیی و جێبەجێ ناکرێت.

 

باکگراوند: ڕۆژی دووشەممە 2025.5.12، لەسەر بانگەوازی عەبدوڵڵا ئۆجەلان، ڕێبەری زیندانیکراوی پەکەکە، ئەو ڕێکخراوە دەرئەنجامی کۆتا کۆنگرەی خۆی ئاشکراکرد و ڕایگەیاند، خۆیان هەڵدەوەشێننەوە و کۆتایی بە خەباتی چەکداریی دەهێنن.