بە ناوی ژنهێنانەوە فێڵ لە نابینایەک و 16 کەسی دیکە دەکرێت

ئاڤا نیوز

گەنجێکی نابینا لە کەرکووک لەخشتە دەبرێ و بەناوی هاوسەرگیرییەوە زیاتر لە چوار ملیۆن دیناری لێیوەردەگرن.

وێنە گەورەکە: محەممەد سەردار، گەنجێکی نابینایە و دانیشتووی گوندی یەنگیجەیە لە داقووقی سەر بە پارێزگای کەرکووک، گەنجەکە حەزی دەچێتە ژنهێنان و داوا لە ماڵەوە و دۆست و هاوڕێکانی دەکات ژنێکی باشی بۆ بدۆزنەوە تاوەکو هاوسەرگیری لەگەڵ بکات.

چیرۆکەکە بەم شێوەیەیە:

پیاوێک بە ناوی سەمەد بەوە ناوبانگی دەرکردووە کە دەڵاڵی ژنە و بەحەڵاڵی ژن بۆ ئەو کەسانە دەدۆزێتەوە کە دەچنە لای، دوای ئەوەی دۆست و نزیکانی گەنجە نابیناکە لەبارەیەوە دەزانن، لەگەڵ محەممەد سەردانی دەڵاڵەکە دەکەن و داوای لێدەکەن ژنێکی باشی بۆ بدۆزێتەوە و ئەویش هەر لەوێ پێیان دەڵێت، "پیاوێک لە مووسڵ هەیە دەیەوێت کچەکەی بەشوو بداتە کەسێکی باش و دیندار".

محەممەد یەکسەر دەست بە ئامادەکارییەکانی دەکات و ژوورێکی نووستن بە تەواوی کەلوپەلی ناوییەوە ئامادە دەکات و ڕۆژێک سەمەد پەیوەندی پێوە دەکات و داوای لێدەکات 600 هەزار دیناری پێبدات تاوەکو بۆ کچەی بنێرێت و پێداویستی و جلوبەرگەکانی پێ بکڕێت.

سەمەد هەر بەوە ناوەستێ و چەند جارێکی دیکە تەلەفۆن بۆ محەممەد دەکاتەوە و بێ ئەوەی زاوا بووکەکەی بینیبێت بە بیانووی جۆراوجۆر زیاتر لە چوار ملیۆن و نیو دینار خەرجی پێدەکات، لە کاتێکدا محەممەد تەنیا لەسەر 125 هەزار دیناری مووچەی مانگانەکەی دەژیێت.

ڕێککەوتنەکە بەو شێوەیەیە: محەممەد و سەمەد ڕێکدەکەون پێنجشەممەیەک بچنە مووسڵ تاوەکو لەنزیکەوە خانەوادەکە ببینن و کاری مارەبڕینەکەش ئەنجام بدەن، بەڵام لەناکاو سەمەد تەلەفۆنێکی دیکە بۆ گەنجە نابیناکە دەکات و پێیدەڵێت، باوکی کچەکە وتوویەتی ئەمڕۆ مەیەن و سەردانەکەتان بخەنە یەکشەممە، گەنجەکەش چاوەڕێ دەکات و ڕۆژی یەکشەممە دەچنە مووسڵ لەوێ کە دەگەنە لای ماڵی کچەکە کەس دەرگایان بەڕوودا ناکاتەوە و دراوسێیەکی ماڵەکە پێیان دەڵێت: دەمێکە ماڵیان بار کردووە و ناشزانین چوون بۆ کوێ.

سەمەد کە بە دەڵاڵی ژن ناوبانگی دەرکردبوو، دەرکەوت فێڵبازە و بەناوی دۆزینەوەی ژن بۆ خەڵک 17 کەسی دیکەی ئەو ناوچەیەی هەڵخەڵەتاندووە و هەر لە گوندی یەنگیجە بە درۆ خۆی کردووە بە مەلا و پیرەمێردێکی تەمەن 85 ساڵانی بەو شێوازە لەخشتە بردووە، لەویش سێ ملیۆن دیناری وەرگرتووە. ئێستا سەمەد لە هەرێمی کوردستان فەرمانی دەستگیرکردنی بۆ دەرچووە.