هاتوچۆ لە دەروازەی نێودەوڵەتی حاجی ئۆمەران دەستپێدەکاتەوە

ئاڤا نیوز

دوای 14 کاتژمێر لە وەستانی گەشتی هاووڵاتیانی هەرێمی کوردستان لە دەروازەی حاجی ئۆمەران، هاتوچۆ ئاسایی دەبێتەوە و هاووڵاتیان دەتوانن گەشتەکانیان بکەن.

چیرۆکی سەرەکی: پێشنیوەڕۆی ڕۆژی سێشەممە، لە دەروازەی تەمەرچینی دیوی ڕۆژهەڵاتی کوردستان بەهۆی دروستبوونی گرفتێکی تەکنیکی، سەدان هاووڵاتی هەرێمی کوردستان بەهۆکاری جیاواز ویستوویانە لەڕێگەی دەروازەی حاجی ئۆمەرانەوە گەشتی وڵاتی ئێران، بە دیاریکراوی شارەکانی ڕۆژهەڵاتی کوردستان بکەن، نەیانتوانیوە گەشت بکەن و گەڕێنراونەتەوە.

لێدوانی فەرمی: سالار تەحسین، بەرێوەبەری نشینگەو پاسپۆرتی حاجی ئۆمەران بە ئاڤای گوت، "تاوەکو کاتژمێر 11:30ـی شەوی ڕابردوو، بەهۆی وەستانی سیستەم لە دیوی ئێران، هاووڵاتیان نەیاندەتوانی گەشتی ئەو وڵاتە بکەن، بەڵام ئێستا کێشەکە چارەسەر کراوە و ئەوانەی دوێنی گەڕێنراونەتەوە دەتوانن ئەمڕۆ گەشتەکانیان بکەن."

ئەوەی پێویستە بیزانیت: حاجی ئۆمەران یەکێکە لەدەروازە سنوورییەکانی نێوان هەرێمی کوردستان و کۆماری ئیسلامی ئێران، هۆکارێکە بۆ ئاڵوگۆڕکردنی کاڵا و کەل و پەل لەنێوان هەردوولا، ڕۆژانە سەدان گەشتیار لەڕێگەی ئەو دەروازەیەوە هاتوچۆ دەکەن.