سەعدی پیرە: کۆبوونەوەکانی پارتی و یەکێتی لە قۆناغی کۆتاییدایە

ئاڤا نیوز

بە گوتەی ئەندامێکی مەکتەبی سیاسیی یەکێتی نیشتمانی، گفتوگۆی نێوان شاندەکانی دانووستانکار بۆ پێکهێنانی کابینەی نوێی حکومەت لە قۆناغی کۆتاییدایە، ئەو ئەندامەی مەکتەبی سیاسیی یەکێتی دەڵێت 'دەزانم لەم ماوەیە کۆدەبنەوە'.

وێنە گەورەکە: ڕۆژی 27-5-2025، مەکتەبی سیاسیی یەکێتی نیشتمانی کۆبووەوە، یەکێک لە تەوەرەکانی کۆبوونەوەکەش گفتوگۆکردن بوو لەسەر دەرئەنجامی گفتوگۆی نێوان شاندی دانووستانکار بۆ پێکهێنانی کابینەی نوێی حکومەت، هەروەها دیاریکردنی کاتی کۆبوونەوەی داهاتووی شاندی دانووستانکار.

لێدوانی سەرەکی: سەعدی ئەحمەد پیرە، ئەندامی مەکتەبی سیاسیی یەکێتی نیشتمانی کوردستان بە ئاڤا میدیای ڕاگەیاند: کۆبوونەوەی شاندەکانی دانووستانکار بەردەوام دەبن و ئێستا لە قۆناغی کۆتاییدایە، دەزانم لەم ماوەیە هەردوو شاندەکە جارێکی دیکە کۆدەبنەوە.

- لە کۆبوونەوەی ڕابردوو یەکێتی لیستێکی داواکاری بە پارتی داوە، ئێستا دەبێت پارتی کاردانەوە و وەڵامدانەوەی بۆ ئێمە هەبێت، تا بزانین چ شتێکی لە داواکارییەکان قبووڵە و چی قبووڵ نییە، واتە کۆبوونەوەی داهاتوو لەسەر بنەمای ئەم بابەتە دەکرێت.

سەعدی ئەحمەد پیرە باس لەوەش دەکات، کە یەکێتی و پارتی دوو مانگیان بۆ ڕێکخستنی دیدی هاوبەش بەڕێکردووە، دیدی هاوبەش بۆ شەراکەتە نەک یەکێک ببێت بە حاکم و ئەویتر هیچ نەبێت، بۆیە ئێستا گفتوگۆکان لەسەر پۆستە سەرەکییەکانن.