هەژماری من سێ تیم بۆ سلێمانی زیاد دەکات

ئاڤا نیوز

 

پڕۆژەی هەژماری من بۆ خێراترکردنی پرۆسەی پڕکردنەوەی فۆرم بۆ مووچەخۆرانی سنووری سلێمانی، سێ تیمی دیکە لە پارێزگای سلێمانی بۆ بەڕێوەبەرایەتی گشتیی پەروەردە و زانکۆی پۆلیتەکنیک زیاد دەکات.

 

وێنە گەورەکە: دوای ئەوەی وەزارەتی دارایی و ئابووریی هەرێمی کوردستان مووچەخۆرانی ئاگادارکردەوە، ئەگەر تاوەکو 1-6-2025، دەست بە مامەڵەی خۆتۆمارکردن لە هەژماری من نەکەن، ئەوا مووچەیان ڕادەگیرێت تا مامەڵەکانیان تەواو دەکەن؛ ئێستا ڕۆژانە هەزاران خانەنشین ڕوو لە بانکەکان دەکەن، چونکە زۆرترین مووچەخۆر لەو سنوورە خۆیان لە هەژماری من تۆمار نەکردووە.

 

لێدوانی فەرمی: تیمی هەژماری من بە ئاڤای گوت، "ئێستا مووچەخۆرانی سلێمانی دەتوانن لە 14 شوێن فۆڕم پڕکەنەوە. بۆ فەرمانبەری حکومی، تەنها دوو بەڕێوبەرایەتیی گشتی و شوێنی پۆلیتەکنیکمان هەیە، بۆ خانەنشینان، بانکەکانی تویمەلیک، تانجەرۆ، مەڵکەندیمان هەیە بە 5 لقەکەیەوە، لە پاڵ ئەوانەشدا، سێ تیم زیادکراون کە دووانیان بۆ بەڕێوەبەرایەتیی گشتیی پەروەردە و یەکێکیان بۆ زانکۆی پۆلیتەکنیکی سلێمانی."

 

لەلایەکی دیکەوە: پێشووتر شۆخان عومەر، بەرێوبەری بانکی مەڵکەندی لە سلێمانی بە ئاڤای ڕاگەیاندبوو، 31-5-2025، دوایین وادە نابێت بۆ پڕکردنەوەی فۆرمی هەژماری من بۆ مووچەخۆرانی سنووری سلێمانی، هۆشدارییەکەی وەزارەتی دارایی مووچەخۆرانی ئەو سنوورە ناگرێتەوە و تەنیا هەولێر و دهۆک دەگرێتەوە، چونکە لە سلێمانی تاوەکو ئێستا نزیکەی 200 هەزار مووچەخۆر ماون خۆیان لە هەژماری من تۆمار بکەن.