لە 24 کاتژمێری داهاتوو ئەنجامی تاقیکردنەوەکانی پۆلی 9ـی بنەڕەتی و پۆلە ناکۆتاکان ڕادەگەیێنرێت

ئاڤا نیوز

دوای سێ ڕۆژ لە پڕۆسەی وردبینی، بڕیارە تا سبەی شەو ئەنجامی تاقیکردنەوەکانی پۆلی 9ـی بنەڕەتی و پۆلە ناکۆتاکان لەڕێگەی ئەپلیکەیشنی 'ئی هەڵسەنگاندن'ـەوە بڵاو بکرێتەوە.

چیرۆکی سەرەکی: ڕۆژی 2025-05-15، تاقیکردنەوەی نیشتمانی پۆلی نۆیەمی بنەڕەتی دەستیپێکرد و  129 هەزار و 682 قوتابی بەشدار بوون، دوو ڕۆژ دواتر و ڕۆژی شەممە 2025-05-17، تاقیکردنەوەی پۆلە ناکۆتاکان بە بەشداری یەک ملیۆن و 387 هەزار و 895 قوتابی دەستیپێکرد.

زانیاریی تایبەت: ئاڤا زانیویەتی ئەگەر هیچ گرفتێک نەیەتە پێش، ئەمشەو یان سبەی ئەنجامی تاقیکردنەوەکانی پۆلی نۆی بنەڕەتی و پۆلە ناکۆتاکان ڕادەگەیێنرێت.

لەلایەکی دیکەوە: پێشووتر د. ئالان حەمە سەعید، وەزیری پەروەردەی حکومەتی هەرێمی کوردستان بە ئاڤای ڕاگەیاند: ڕۆژی پێنجشەممە یان سەرەتای هەفتەی داهاتوو ئەنجامی تاقیکردنەوەکانی پۆلی 9ـی بنەڕەتی و پۆلە ناکۆتاکان لەڕێگەی ئەپلیکەیشنی 'ئی هەڵسەنگاندن'ـەوە بڵاو دەکرێتەوە.