پارتی: تا پێش جەژن مووچە ڕەوانە نەکرێت هەڵوێستی جددیمان دەبێت

ئاڤا نیوز

 

پارتی دیموکراتی کوردستان ڕایدەگەیێنێ، ئەگەر بەغدا تا پێش جەژنی قوربان شایستە داراییەکانی خەڵکی هەرێمی کوردستان ڕەوانە نەکات، هەڵوێستی جدیان دەبێت.

 

چیرۆکی سەرەکی: ڕۆژی چوارشەممە ڕێککەوتی 28ـی 5ـی 2025، تەیف سامى، لەڕێگەی نووسراوێکەوە حکومەتی هەرێمی کوردستانی ئاگادارکردووەتەوە کە چیدیکە بەغدا ناتوانێت مووچەی فەرمانبەرانی کوردستان بنێرێت، ئەمەش بە پاساوی ئەوەی هەرێمی کوردستان بڕی پشکی خۆی لە یاسای بودجە تێپەڕاندووە.

 

بڵاوکراوەی فەرمی: پارتی دیموکراتی کوردستان بڵاویکردەوە، "ڕای گشتی عێراق و هەرێمی کوردستان ئاگادار دەکەینەوە کە حکومەتی فیدراڵی بەردەوامە لە پێشێلکردنی مافە دەستوورییەکانی هەرێمی کوردستان و دوا پێشلکاریشی نووسراوەکەی ڕۆژی چوارشەممەی وەزارەتی داراییە کە دژی دەستوور و بنەماکانی ڕێککەوتنی پێکهێنانی حکومەتە و، بە سیاسیکردنی قوتی خەڵکە".

 

لە ڕاگەیێنراوەکەی پارتیدا هاتووە، "ئەم بابەتە لە کۆبوونەوەی داهاتووی کۆمیتەی ناوەندیی پارتی لە 2ـی 6ـی 2025، دەخەینە بەرباس و بڕیاروەرگرتن و ئەگەر تا پێش جەژنی پیرۆزی قوربان ماف و شایستە داراییەکانی خەڵکی هەرێمی کوردستان ڕەوانە نەکرێت هەڵوێستی جدیمان دەبێت و ڕایدەگەیێنێن.

 

لەلایەکی دیکە: فازڵ نەبی، بریکاری پێشووتری وەزارەتی دارایی عێراق بە ئاڤا میدیای ڕاگەیاند: ئەو نووسراوەی كە تەیف سامی، وەزیری دارایی عێراق كردوویەتی كە ئاماژەی بە چەند خشتەیەكی ساڵەكانی 2023 و 2024 و 2025 كردووە، لە ڕووی یاسای داراییەوە هەڵەیەكی زۆر گەورەیە، وەزارەتی دارایی عێراق بە هەڵە لە بودجەی سێ ساڵی تێگەیشتووە.

 

ئەوەی پێویستە بیزانیت: ڤیان سەبری، سەرۆکی فراکسیۆنی پارتی لە پەرلەمانی عێراق بە ئاڤا میدیای ڕاگەیاند، لەسەر نوسراوەکەی تەیف سامی، فراکسیۆنە کوردستانییەکان یاداشتێکی ناڕەزایی ئاراستەی محەممەد شیاع سوودانی، سەرۆکوەزیرانی عێراق دەکەن، تیایدا جەخت دەکەنەوە کە نابێت بابەتی مووچەی فەرمانبەرانی هەرێمی کوردستان بە پرسی سیاسییەوە گرێ بدرێت، بۆ چارەسەری ئەم پرسەش هەموو ڕێکارێک دەگرنەبەر تەنانەت تا دەگاتە کشانەوە لە پرۆسەی سیاسی.