بەهۆی نەناردنی مووچەی خەڵکی کوردستان یاداشتێک ڕادەستی سوودانی دەکرێت

ئاڤا نیوز

 

سەرۆکی فراکسیۆنی پارتی لە پەرلەمانی عێراق دەڵێت، بڕیارەکەی وەزارەتی دارایی فیدڕاڵ بۆ ڕاگرتنی مووچەی فەرمانبەرانی کوردستان ڕەتدەکەنەوە و لەمبارەیەوە فراکسیۆنە کوردستانییەکان یاداشتێکی ناڕەزایی ئاراستەی سەرۆکوەزیرانی عێراق دەکەن.

 

وێنە گەورەکە: بەپاساوی ئەوەی هەرێمی کوردستان پشکی لە بودجەدا تەواوبووە و داهاتی ناوخۆشی ڕادەستنەکردووە، ڕۆژی چوارشەممە تەیف سامی، وەزیری دارایی عێراق واژۆی لەسەر نووسراوێک کردووە و تیایدا ئاماژەی بەوەداوە چیتر مووچەی فەرمانبەرانی کوردستان خەرج ناکات.

 

لێدوانی فەرمی: ڤیان سەبری، سەرۆکی فراکسیۆنی پارتی لە پەرلەمانی عێراق بە ئاڤا میدیای ڕاگەیاند، لەسەر نوسراوەکەی تەیف سامی، فراکسیۆنە کوردستانییەکان یاداشتێکی ناڕەزایی ئاراستەی محەممەد شیاع سوودانی، سەرۆکوەزیرانی عێراق دەکەن، تیایدا جەخت دەکەنەوە کە نابێت بابەتی مووچەی فەرمانبەرانی هەرێمی کوردستان بە پرسی سیاسییەوە گرێ بدرێت، بۆ چارەسەری ئەم پرسەش هەموو ڕێکارێک دەگرنەبەر تەنانەت تا دەگاتە کشانەوە لە پرۆسەی سیاسی.

 

وتیشی، دادگای فیدڕاڵی لەم پرسەدا پشتیووانی هەرێمی کوردستانە، چونکە ئەوانیش دەڵێن نابێت بابەتی مووچە بە کێشەی هونەری و سیاسییەوە ببەسترێتەوە، چونکە حکومەتی هەرێمی کوردستانیش بەگوێرەی دەستوور مافی لە بودجەدا هەیە.

 

لەبارەی پاساوی حکومەتی عێراقیش بۆ ڕادەستنەکردنی داهاتی نەوت، ڤیان سەبری ئەوەی خستەڕوو، یاسای بودجە بۆ دەستپێکردنەوەی هەناردەی نەوتی کوردستان هەموار کراوەتەوە، بەڵام  حکومەتی عێراق تائێستا وەک پێویست پابەندی جێبەجێکردنی هەمواری یاساکە نەبووە و ئەرکەکانی خۆی بەرامبەر حکومەتی کوردستان بەگوێرەی یاساکە جێبەجێنەکردووە.