ترەمپ سووریا وەک دەوڵەتێک دەناسێنێت کە چیتر پاڵپشتی تیرۆر ناکات

ئاڤا نیوز

 

تۆماس باراک، نێردەی ئەمریکا بۆ سووریا لەگەڵ ئەحمەد شەرع سەرۆککۆماری سووریا کۆبوویەوە، پەیامی ترەمپی پێگەیاند، کە ئەمریکا بەنیازە سووریا وەک دەوڵەتێک کە چی دیکە پاڵپشتی تیرۆر ناکات، بناسێنێت.

 

وێنە گەورەکە: دوای ئەوەی تۆماس باراک لەلایەن دۆناڵد ترەمپ وەک نێردەی ئەمریکا بۆ سووریا دەستنیشان کرا، ئەمڕۆ پێنجەشەممە بۆ یەکەمجار وەفدێکی باڵای ئەمریکیی گەیشتە دیمەشقی پایتەختی سووریا، باراک لە کۆشکی گەل لە دیمەشق لەگەڵ ئەحمەد شەرع، سەرۆککۆماری سووریا کۆبوویەوە.

 

لێدوانی فەرمی: تۆماس باراک، نوێنەری ئەمریکا بۆ کاروباری سووریا ڕاگەیاند، ئامانجی دۆناڵد ترەمپ، سەرۆکی ئەمریکا بەهێزکردنی حکومەتی ئێستای سووریایە. بەمنزیکانە ترەمپ، سووریا وەک دەوڵەتێک دەناسێنێت کە پاڵپشتی و  سپۆنسەری تیرۆر ناکات، دیدگای ترەمپ ئەوەیە کە دەرفەتێک بدات بە حکومەتە نوێیەکە بەبێ دەستێوەردان.

 

ئەوەی پێویستە بیزانیت: دوای ئەوەی وەزارەتی گەنجینەی ئەمریکا یەکەم هەنگاوی بۆ هەڵگرتنی سزاکانی سەر سووریا جێبەجێ کرد و بۆ ماوەیەکی کاتی بەشێک لە سزا ئابوورییەکانی سەر ئەو وڵاتەی هەڵگرت، ئەحمەد شەرع، یەکێک بوو لەو کەسانەی کە لە نێو سزاکانی ئەمریکادا بوو.

 

زانیاریی زیاتر: لەکاتی سەردانەکەی باراک بۆ دیمەشق لە شوێنی مانەوەی خۆی لە باڵەخانەکەیدا ئاڵای ئەمریکای هەڵکرد.