کۆشکی سپی: بۆ ئاگربەست چاوەڕێی وەڵامی حەماس دەکەین

ئاڤا نیوز

ئەمریکا پێشنیازی نوێی بۆ ڕاگەیاندنی ئاگربەست بۆ ئیسرائیل و حەماس ناردووە، کۆشکی سپیش دەڵێت، وەڵامی ئیسرائیل ئەرێنی بووە و چاوەڕێی وەڵامی حەماس دەکەین.

وێنە گەورەکە: بە نێوەندگیریی ئەمریکا، ئیسرائیل و حەماس گەیشتوونەتە قۆناغێکی نوێ بۆ ڕاگەیاندنی ئاگربەست.

لێدوانی فەرمی: کارۆلین لیڤێت، وتەبێژی کۆشکی سپی ڕایگەیاند، هیوادارین بگەینە ڕێککەوتنی ئاگربەست تاوەکو هەموو بارمتەکان بگەڕێنەوە بۆ ماڵەکانیان.

- گفتوگۆکان لەسەر پێشنیازی نوێی ستیڤ ویتکۆف، نوێنەری ترەمپ بۆ ڕۆژهەڵاتی ناوەڕاست بۆ ئاگربەست بەردەوامە.

- پێشنیازی نوێی ستیڤ ویتکۆف لەلایەن ئیسرائیلەوە قبووڵکراوە و نێردراویشە بۆ حەماس و چاوەڕێی وەڵامی حەماس دەکەین.

لەلایەکی دیکەوە: میدیاکانی ئیسرائیل ئاشکرایانکردووە، حکومەتی ئیسرائیل بە پێشنیازی نوێی ستیڤ ویتکۆف ڕازی بوون.

بۆچوونی لایەنی بەرامبەر: بزوتنەوەی حەماس ڕایگەیاندووە، پێشنیازی نوێی ستیڤ ویتکۆفیان بەدەستگەیشتووە و خوێندنەوەی بۆ دەکەن.

ئەوەی پێویستە بیزانیت: بەرپرسێکی ئیسرائیل ئەوەی بۆ میدیاکانی ئیسرائیل ئاشکرا کردووە، وردەکاری پێشنیازی نوێی ستیڤ ویتکۆف بریتییە لە ئازادکردنی 10 بارمتەی زیندوو و 18 بارمتەی مردوو لە دوو قۆناغدا لە بەرامبەر ئاگربەستی 60 ڕۆژە لە کەرتی غەززە.

باسی لەوەشکردووە، پێشنیازەکە هیچ داوایەکی بۆ ئیسرائیل تیا نییە کە بەتەواوی کۆتایی بە جەنگ بهێنێت و هێزەکانی لە کەرتی غەززە بکشێنێتەوە.