سووریا بە بەهای حەوت ملیار دۆلار وەبەرهێنان لە کەرتی وزە دەکات

ئاڤا نیوز

 

بە ئامانجی وەبەرهێنان لە کەرتی وزە و بەرهەمهێنانی کارەبا، حکومەتی سووریا چەندین یاداشتنامەی لێکتێگەیشتنی لەگەڵ چەند کۆمپانیایەکی جیهانی بەبڕی حەوت ملیار دۆلار واژۆکرد.   

 

چیرۆکی سەرەکی: بەئامادەبوونی ئەحمەد شەرع، سەرۆککۆماری سووریا، وەزارەتی وزەی سووریا ڕۆژی پێنجشەممە 29-5-2025 لەدیمەشقی پایتەخت، چوار یاداشتنامەی لێکتێگەیشتنی لەگەڵ گرووپی UCC، ئورباکۆن، پاوەر ئینتەرناشناڵ و جەنگیز ئینێرجی واژۆکرد.

 

لێدوانی فەرمی: محەممەد بەشیر، وەزیری وزەی سووریا ڕایگەیاند: ڕێککەوتنەکە بریتییە لە پەرەپێدانی چوار وێستگەی کارەبای غازی لە ناوچەکانی دێرەزۆر، مەهەردە و زەیزون لە لادێکانی حەما، و تریفاوی لە لادێکانی حومس، بۆ  بەرهەمهێنانی نزیکەیی چوار هەزار مێگاوات.

 

- هاوکات دامەزراندنی وێستگەیەکی کارەبای وزەی خۆر بە توانای هەزار مێگاوات لە دۆڵی وادی ڕەبیعە لە باشووری سووریا.

 

لەلایەکی دیکەوە: ڕامز خەیات، بەڕێوەبەری جێبەجێکاری کۆمپانیای ئورباکۆن قابیزەی قەتەری ڕایگەیاند: پڕۆژەکە زیاتر لە 50 هەزار هەلی کاری ڕاستەوخۆ و 250 هەزار هەلی کاری ناڕاستەوخۆ بۆ خەڵکی سووریا دەڕەخسێنێت.