بێ کارەبایی دانیشتووانی کوفە دەڕژێنێتە سەر شەقام و بە تووندوتیژی وەڵام دەدرێنەوە

ئاڤا نیوز

خەڵکی ناوچەی بەراکییە لە قەزای کوفە دژی نەبوونی کارەبا و خزمەتگوزاریی هاتە سەر شەقام و دەستیان بە خۆپیشاندان کرد، هێزە ئەمنییەکان لەبری بەدەمەوەچوونیان تووندوتیژییان بەکارهێنا و پێکدادان ڕووی دا.

زانیاریی بەدەستهاتوو: خۆپیشاندەران بە سووتانی تایەی ئۆتۆمبێل ڕێگاکانیان داخست و هاتووچۆیان لە ڕێگەکان پەکخست، دواتر هێزە ئەمنییەکان هەوڵی بڵاوەپێکردنی خۆپیشاندەرانی دا و لە ئەنجامدا شەڕ و پێکدادان ڕوویدا، هاوکات بەشێک لە خۆپیشاندەران دەستگیرکران.

زانیاریی زیاتر: ماوەی چەند مانگێکە دانیشتووانی ناوچەی بەراکییە داوای باشترکردنی خزمەتگوزارییەکانی کارەبا و ئاو و پاکوخاوێنی دەکەن، بەڵام سەرەڕای بەڵێنی چارەسەرکردنی کێشەکانیان لە لایەن بەرپرسانەوە تاوەکو ئێستا داواکارەکانیان جێبەجێ نەکراون.