لە هێرشێکی چەکداریدا ژمارەیەک پۆلیسی پاکستان کوژران

ئاڤا نیوز

ئەمڕۆ شەممە، پارێزگای بەلووچستانی پاکستان ڕووبەڕووی زنجیرەیەک هێرش بووەوە کە لەلایەن جووداخوازە بەلووچەکانەوە ئەنجامدران.

زانیاریی بەدەستهاتوو: بەپێی سەرچاوە فەرمییەکانی پۆلیسی بەلووچستان، تا ئێستا کوژرانی لانی کەم 10 پۆلیس و 5 کەسی مەدەنی پشتڕاستکراوەتەوە و هێرشەکان چەندین ناوچەی جیاوازی گرتووەتەوە کە بە شێوەی چەکداری و خۆکوژی بوون و لە شارەکانی (کویتا، پاسنی، مەستونگ، نوشکی و گەوادەر) ئەنجامدراون.

لەلایەکی دیکەوە: سوپای پاکستان ڕایگەیاند، هێرشەکان بە لاوازی" ئەنجامدراون و بەهۆی وەڵامدانەوەی خێرای هێزە ئەمنییەکانەوە شکستیان هێناوە، بەڵام بەرپرسانی پۆلیس لە ناوچە جیاوازەکان ئاماژە بەوە دەکەن هێشتا بارودۆخەکە بە تەواوی کۆنترۆڵ نەکراوە.

زانیاریی زیاتر: بەهۆی تێکچوونی دۆخی ئەمنی، دەسەڵاتداران چەند ڕێککارێکی تووندیان گرتووەتەبەر، لەوانە هێڵەکانی مۆبایل لە ناوچە تێکچووەکان بڕدراون، هەروەها  جووڵەی شەمەندەفەر لە سەرتاسەری پارێزگاکە ڕاگیراوە و هاتووچۆی سەر ڕێگا سەرەکییەکان پەکی کەوتووە.

ڕاگەیێنراوی فەرمی: لە ڕاگەیێنراوێکدا سوپای ڕزگاریخوازی بەلووچستان کە چالاکترین گرووپی چەکداری جووداخوازە لە ناوچەکەدا، بەرپرسیارێتی هێرشەکانی گرتە ئەستۆ و ڕایگەیاند، ئامانجیان بنکە سەربازییەکان و بەرپرسانی کارگێڕی و پۆلیس بووە.

ئەوەی پێویستە بیزانیت: بەلووچستان دەوڵەمەندترین پارێزگای پاکستانە لە ڕووی سەرچاوە سرووشتییەکانەوە، بەڵام هەژارترین ناوچەی وڵاتەکەیە. جووداخوازە بەلووچەکان چەندین دەیەیە شەڕ دەکەن و دەڵێن حکومەتی ناوەندی سامانەکانیان تاڵان دەکات، هەر بۆیە هێرشەکانیان بۆ سەر هێزە ئەمنییەکان، کرێکارانی دەرەوەی پارێزگاکە و کۆمپانیا بیانییەکانی وزە چڕکردووەتەوە.