لە هەولێر مەراسیمێکی گەورە بۆ شەهیدانی یەکی شووبات بەڕێوەدەچێت

ئاڤا نیوز

 

لەساڵیادی شەهیدانی 'یەکی شووبات' مەراسیمێکی گەورە لە پارکی سامی عەبدولڕەحمان لە شاری هەولێر بەڕێوەدەچێت و سبەی 22 ساڵ بەسەر ئەو کردەوە تیرۆریستییە تێدەپەڕێت.

چیرۆکی سەرەکی: لە ڕۆژی 1ـی شووباتی 2004، دوو کردەوەی خۆکوژی لە بارەگای لقی دووی پارتی و مەڵبەندی سێی یەکێتی لە هەولێر ڕوویدا، بەوهۆیەوە 103 کەس شەهید بوون و ژمارەیەکی دیکەش برینداربوون، سبەی 22 ساڵ بەسەر ئەو کردەوە تیرۆریستییە تێدەپەڕێت.

لێدوانی فەرمی: سەرچاوەیەکی باڵا لە وەزارەتی شەهیدان و ئەنفالکراوان بە ئاڤا میدیای ڕاگەیاند: کاتژمێر 10:00ی پێشنیوەڕۆی 1-2-2026، لە مۆنۆمێنتی شەهیدانی یەکی شووبات لە پارکی سامی عەبدولڕەحمان، بە ئامادەبوونی سەرۆکوەزیران مەسرور بارزانی، وەزیری شەهیدان و ئەنفالکراوان، پارێزگاری هەولێر، کۆنسوڵ، نوێنەری وڵاتان و کەسوکاری شەهیدانی یەکی شووبات، مەراسیمێکی گەورە بەڕێوەدەچیت.

سەرچاوەکەی وەزارەتی شەهیدان و ئەنفالکراوان وتی: "لە مەراسیمەکەدا تاجە گوڵینەی سەرۆکی هەرێمی کوردستان، سەرۆکوەزیران مەسرور بارزانی، وەزارەتی شەهیدان و ئەنفالکراوان و کەسوکاری شەهیدان دادەنرێت."

لەلایەکی دیکەوە: ئومێد خۆشناو، پارێزگای هەولێر، بە ئاڤا میدیای ڕاگەیاند: ئامادەکارییەکان بۆ مەراسیمەکە تەواو بووە، سبەی یەکشەممە مەراسیمێکی شایستە بۆ یادی شەهیدانی یەکی شووبات لە پارکی سامی عەبدولڕەحمان بەڕێوەدەچێت و بەرپرسانی باڵای حکومی و حزبیش تێدا بەشدار دەبن.