بەغدا بەپلان شوێنی عەمبارکردنی گەنمی جووتیاران لە کوردستان ناهێڵێت

ئاڤا نیوز

 

بەپێی پلانی وەرگرتن و بەکارهێنانەوەی گەنمی جووتیاران لە عێراق، دەبێت مانگانە لە هەر پارێزگایەک بڕێک لە گەنمی عەمبارکراو بنێردرێت بۆ ئاشەکان و بکرێتەوە بە ئارد بۆ دابەشکردن، بەڵام ئەم پلانە لە پارێزگاکانی هەرێمی کوردستان جێبەجێ ناکرێت و سەرباری ئەوەی سایلۆکان پڕن لە گەنمی وەرگیراوی جووتیاران، گەنم لە کەرکووک و موسڵەوە دەهێنرێت و لە ئاشەکانی کوردستان دەکرێنەوە بە ئارد، بەهۆیەوە لە سایلۆکانی هەرێمی کوردستان شوێنی عەمبارکردنی گەنمی ئەمساڵ نەماوە.

 

چیرۆکی سەرەکی: مانگانە پێویستە لە سایلۆی هەر شارێک 22 هەزار تۆن گەنم بنێردرێت بۆ ئاشەکانی ئەو پارێزگایە و بکرێت بە ئارد بۆ ئەوەی دابەش بکرێت، بەڵام بەغدا لەماوەی ساڵی ڕابردوودا تاوەکو ئێستا چوار پشکی پارێزگاکانی موسڵ و کەرکووکی هێناوە بۆ شارەکانی کوردستان، ئەمەش لە پێناو ئەوەی سایلۆکانی ئەو پارێزگایانە بەتاڵ بێت و سایلۆکانی هەرێمی کوردستان توانای وەرگرتنی گەنمیان نەبێت.

 

لێدوانی فەرمی: میران بەختیار، بەڕێوەبەری سایلۆی هەولێر بە ئاڤا میدیای ڕاگەیاند، "ئەوەی ئێستا بۆمان بووەتە گرفت، تەنیا لە سایلۆی هەولێر 97 هەزار تۆن گەنمی ساڵی پار ماوەتەوە و بە زەحمەت دەتوانرێت شوێن بۆ گەنمی ئەمساڵ بکرێتەوە، بۆ سلێمانی و دهۆکیش هەمان کێشە هەیە، بەڵام ئەوان ژمارەی سایلۆکانیان زیاترە".

 

چارەسەرەکان: بەڕێوەبەری سایلۆی هەولێر گوتیشی: "هەولێر تەنیا دوو سایلۆی هەیە، ئەمساڵ لە سایلۆی قوشتەپە ناتوانین یەک دەنک گەنم وەربگرین، ناچارین تا پشکی ئەو چەند مانگەمان لێ وەردەگیرێت گۆڕەپانی سەنتەری کۆیە و گۆڕەپانی سایلۆی هەولێر بۆ گەنمی ئەمساڵ تەرخان بکەین، ئەگەر مانگی شەشمان لێ وەربگرن دەبێت لەلایەک سایلۆ بەتاڵ بکەین لەلایەک گەنم وەربگرین".

 

ئەوەی پێویستە بیزانیت: لە بەشێکی ناوچەکانی هەرێمی کوردستان دروێنەی گەنم دەستیپێکردووە، بڕیارە ئەم هەفتەیە لە پارێزگای هەولێر کۆبوونەوەیەک بۆ دیاریکردنی کاتی وەرگرتنی گەنمی جووتیاران بکرێت، بەڕێوەبەری سایلۆی هەولێر دەڵێت، ڕۆژی 10-6 پێشنیاز دەکەین بۆ وەرگرتنی گەنمی ئەمساڵ.

 

باکگراوند: ئەمساڵ پشکی هەرێمی کوردستان بۆ وەرگرتنی گەنم 400 هەزار تۆنە و لەو بڕە 122 هەزار 600 تۆنی پشکی پارێزگای هەولێرە.