لەدوای کاتژمێر 11ـی شەو دانیشتن و مانەوە لە گۆیژە و ئەزمەڕ قەدەغە دەکرێت

ئاڤا نیوز

 

بەبڕیارێکی نوێ و بۆ ڕێگریکردن لە ڕووداوەکانی ئاگرکەوتنەوە، لە دوای کاتژمێر 11ـی شەو دانیشتن و مانەوە لە چیاکانی ئەزمەڕ و گۆیژە لە سلێمانی قەدەغە دەکرێت و ڕێگە نادرێت هاووڵاتییان و گەشتیارانیش لەسەر چیاکان بمێننەوە.

 

وێنە گەورەكە: بەگوێرەی پلانێكی هاوبەشی قایمقامیەتی قەزای ناوەندی سلێمانی و بەڕێوەبەرایەتیی دارستان و پاوانی سلێمانی و لایەنە پەیوەندیدارەكانی دیكە، پلانی پارێزگاریكردن لە سروشتی چیای گۆیژە و ئەزمەڕ جێبەجێ دەكرێت، لە هەنگاوی یەكەمیشدا ڕێگە بە هاووڵاتیان و گەشتیاران نادرێت لە دوای سەعات 11ـی شەوەوە، لەو بەرزاییانە بمێننەوە و كردنەوەی ئاگریش بەهەموو شێوەیەك قەدەغەیە، بڕیارەکەش بۆ پاراستنی ناوچەکەیە لە مەترسییەکانی کەوتنەوەی ئاگر.

 

لێدوانی فەرمی: ئاوارە ئەحمەد، بەڕێوەبەری دارستان و پاوانی سلێمانی لە كۆنفرانسێكی ڕۆژنامەوانیدا ڕایگەیاند، "داوای هاوكاری و پشتیوانیی لە هاووڵاتیان و گەشتیارانی دەکەین، داواکارین پابەندبن بە بڕیارەکانەوە لەپێناو پارێزگاریكردن لە سروشتی جوانی گۆیژە و ئەزمەڕ".

 

- ئاوارە ئەحمەد گوتیشی، داوا لە دەزگاكانی ڕاگەیاندن دەکەین، وەك هەمیشە ڕۆڵیان هەبێت لە هۆشیاركردنەوەی هاووڵاتیان بە پابەندبوونیان بە جێبەجێكردنی ڕێنماییەكان لەپێناو پاراستنی ژینگەی كوردستان".