شاندێکی ئیدارەی خۆبەڕێوەبەری ڕۆژئاوای کوردستان بەرەو دیمەشق بەڕێکەوت

ئاڤا نیوز

 

بەیانی ئەمڕۆ شەممە، شاندێکی ئیدارەی خۆبەڕێوەبەری ڕۆژئاوای کوردستان (خۆسەر) بۆ گفتوگۆ لەگەڵ ئیدارەی نوێی حکومەتی سووریا بەرەو دیمەشق بەڕێکەوتن، ئامانج لە سەردانەکە جێبەجێکردنی بڕگەکانی ڕێککەوتنی 10ـی ئادارە.

 

وێنە گەورەکە: مانگی 12ـی ساڵی ڕابردوو ڕژێمی بەشار ئەسەد ڕووخا و حکومەتی نوێی سووریا دەستبەکار بوو، لە مانگی ئادار مەزڵوم عەبدی، فەرماندەی گشتی هێزەکانی سووریای دیموکرات لەگەڵ ئەحمەد شەرع، سەرۆکی ڕاگوزەری سووریا ڕێککەوتنێکیان واژۆ کرد و ئەمە یەکەم دانیشتنی هەردوولا دەبێت بۆ جێبەجێکردنی خاڵەکانی ڕێککەوتنەکە.

 

زانیاریی بەدەستهاتوو: ئاژانسی هەواڵی هاوار لە ڕۆژئاوای کوردستان ڕایگەیاندووە، بەیانی ئەمڕۆ شاندێکی حەوت کەسی ئیدارەی خۆبەڕێوەبەری ڕۆژئاوای کوردستان بۆ جێبەجێکردنی ڕێککەوتنی نێوان هەسەدە و حکومەتی سووریا بەرەو دیمەشق بەڕێ کەوتن، ئەندامانی شاندەکە پێکدێن لە (فۆزا یوسف، عەبدولحامد مەهباش، ئەحمەد یوسف، سەنحاریب بەرسووم، سۆزدار حاجی، مریم ئیبراهیم و یاسر سلێمان).

 

زانیاریی زیاتر: ئاڤا زانیویەتی شاندەکە لە نوێنەرانی کورد و عەرەب و سریان پێکدێن، یەکێک لە ئەندامانی شاندەکە سەربازییە و بۆ پرسی سەربازی لەناو شاندەکەیە و ئێوارەی ئەمڕۆ کۆبوونەوەکان دەستپێدەکەن.

 

لەلایەکی دیکەوە: سلێمان ئۆسۆ، ئەندامی سەرکردایەتیی ئەنجوومەنی نیشتمانی کورد لە سووریا (ئەنەکەسە) بە ئاڤا میدیای وت، "ئەم شاندەی دەچێتە دیمەشق ئەندامی ئێمەی لەگەڵ نییە و تەنیا بۆ ڕێککەوتنی ئیدارەی ڕۆژئاوایە لەگەڵ حکومەتی سووریا، بەڵام بۆ ئەو شاندەی بڕیارە بۆ کۆی پرسی کورد بچێتە دیمەشق، چاوەڕێی وەڵامی کاک مەزڵوم عەبدی دەکەین و هێشتا وەڵاممان نەدراوەتەوە و پرۆسەکە دواکەوتووە".

 

باکگراوند: ڕۆژی دووشەممە 10ـی ئاداری 2025، دەقی ڕێککەوتنێکی هەشت خاڵی لە نێوان مەزڵووم عەبدی و ئەحمەد شەرع واژۆکرا و بڕیاردرا دەقی جێبەجێکردنی ڕێککەوتنەکە ماوەی ساڵی 2025 تێپەڕ نەکات.