عەباس عێراقچی: وەڵامی ئەمریکا بەشێوەیەکی گونجاو دەدەینەوە

ئاڤا نیوز

ئەمریکا هەنگاوەکانی بۆ دەستپێکردنەوەی دانوستانەکان دەستپێکردووە و ئێرانیش دەڵێت، خوێندنەوەی بۆ دەکەن و دواتر بڕیار دەدەن.

وێنە گەورەکە: بە نێوەندگیری عومان بەم نزیکانە ئەمریکا و ئێران دانوستانەکانیان سەبارەت بە بەرنامە ئەتۆمییەکەی تاران دەستپێدەکەنەوە.

لێدوانی فەرمی: عەباس عێراقچی، وەزیری دەرەوەی ئێران لە تۆڕی کۆمەڵایەتی ئێکس ڕایگەیاند، بەدر بوسەعیدی وەزیری دەرەوەی عومان بۆ  خستنەڕووی پێشنیازی ئەمریکا بۆ دانوستان سەردانی تارانی کرد.

- پێشنیازەکەی ئەمریکا بە گوێرەی پرەنسیپەکان، بەرژەوەندییە نەتەوەییەکان و مافەکانی خەڵکی ئێران بە شێوەیەکی گونجاو وەڵام دەدرێتەوە.

بۆچوونی لایەنی بەرامبەر: کارۆلین لیڤیت، وتەبێژی کۆشکی سپی ڕایگەیاند، ستیڤ ویتکۆف، نێردەی تایبەتی دۆناڵد ترەمپ بۆ ڕۆژهەڵاتی ناوەڕاست، پێشنیازێکی وورد و قبوڵکراوی بۆ ڕێککەوتنی ئەتۆمی پێشکەش بە ئێران کردووە و قبوڵکردنی لە بەرژەوەندی ئەو وڵاتە دەبێت.

ئەوەی پێویستە بیزانیت: ئەمریکا و ئێران پێنج گەڕی دانوستانیان سەبارەت بە بەرنامە ئەتۆمییەکەی تاران ئەنجامدا و واشنتن دەڵێت، دەبێت ئێران پیتاندنی یۆرانیۆم ڕابگرێت و تارانیش جەخت لە پاراستنی مافی پیتاندنی یۆرانیۆم بۆ مەبەستی مەدەنیانە دەکاتەوە.