شەرع بۆ ئیسرائیل: دوژمنی هاوبەشمان هەیە و دەتوانین ڕۆڵمان لە ناوچەکە هەبێت

ئاڤا نیوز

سەرۆککۆماری سووریا داوا دەکات کۆتایی بە بۆردوومانەکان لەلایەن ئیسرائیلەوە بێت و دەڵێت، سووریا و ئیسرائیل  دوژمنی هاوبەشیان هەیە و "هەردوولامان دەتوانین ڕۆڵێکی سەرەکی لە ئاسایشی ناوچەکەدا بگێڕین".

ڕاگەیێنراوی فەرمی: ئەحمەد شەرع، سەرۆککۆماری سووریا لە چاوپێکەوتنێكی لەگەڵ گۆڤاری "جویش جۆرناڵ"ی ئەمریکی ڕایگەیاند: پێویستە سەردەمی بۆردومانکردن لەنێوان سووریا و ئیسرائیل کۆتایی پێبێت. سووریا و ئیسرائیل دوژمنی هاوبەشیان هەیە و "دەتوانین لە ئاسایشی ناوچەکەدا ڕۆڵێکی گەورە ببینین".

لەلایەکی دیکەوە: شەرع خواستی خۆی بۆ گەڕانەوە بۆ ڕێککەوتنی ئاگربەستی ساڵی 1974 لەگەڵ ئیسرائیل دەربڕی، بەڵام ئاماژەی بەوە کرد ئەم ڕێککەوتنە گرنگ "نەک تەنیا بۆ ئاگربەست، بەڵکو وەک گەرەنتییەکی بنەڕەتی بۆ دان بەخۆداگرتنی هەردوولا بەرامبەر یەکتری و پاراستنی هاووڵاتییانی مەدەنی، بەتایبەتی پێکهاتەکانی درووز لە بەرزاییەکانی جۆلان لە باشووری سووریا".

- بەگوێرەی گۆڤارەکە، سەرۆککۆماری سووریا ڕەتیکردەوە  سەبارەت بە ئاساییکردنەوەی دەستبەجێی پەیوەندییەکانی لەگەڵ ئیسرائیل قسە بکات، بەڵام ئاماژەی بۆ کراوەیی خۆی کرد پەیوەست بە دانوستانەکانی داهاتوو لەسەر بنەمای یاسا نێودەوڵەتییەکان و ڕێزگرتن لە سەروەریی سووریا. وتیشی، "دەبێت ئاشتی لەڕێگەی ڕێزگرتنی یەکترەوە دەستەبەر بکرێت نەک ترس".