هەڵوێستی ئەمریکا لەبارەی گفتوگۆکانی ئیدارەی ڕۆژئاوای کوردستان و دیمەشق

ئاڤا نیوز

 

ئەمڕۆ یەکشەممە گفتوگۆکانی ئیدارەی ڕۆژئاوای کوردستان لەگەڵ دەسەڵاتدارانی نوێی سووریا لە دیمەشق دەستپێدەکات، وەزارەتی دەرەوەی ئەمریکاش دەڵێت، دەرفەتێکی نوێی پێکەوەژیان لە سووریادا هاتووەتەئاراوە.

 

وێنە گەورەکە: بەمەبەستی جێبەجێکردنی ڕێککەوتنەکەی 10ی ئازاری نێوان مەزڵوم عەبدی و ئەحمەد شەرع و گفتوگۆکردن لەسەر وردەکارییەکان، بڕیارە ئەمڕۆ شاندی ئیدارەی خۆسەر یەکەم کۆبوونەوەیان لەگەڵ دەسەڵاتدارانی سووریا لە دیمەشق ئەنجام بدەن. 

 

ئەو مانایە دەگەیێنێت: شاندەکەی ڕۆژئاوای کوردستان سیاسی نین و زیاتر ئیداریی و سەربازیین و نوێنەرایەتی ئیدارەی خۆسەری دەکەن، جگە لەم شاندەش لە 'کۆنفرانسی یەکڕیزیی هەڵوێستی کورد' کە 26ی نیسان لە قامشلۆ بەڕێوەچوو، بڕیاردرا بۆ گفتوگۆ لەسەر مافە دەستوورییەکانی کورد و سیستمی لامەرکەزی بۆ ڕۆژئاوای کوردستان، شاندێکی کوردی هاوبەش سەردانی دیمەشق بکات تائێستا وادەی سەردانی ئەم شاندە دیاریینەکراوە.

 

زانیاریی بەدەستهاتوو: بەرپرسێک لە وەزارەتی دەرەوەی ئەمریکا بە میدیای ڕۆژئاوای کوردستانی ڕایگەیاند، واشنتن لەپاڵ گەلی سووریا دەوەستێت لەوانەش کورد، عەلەوی و مەسیحییەکان، جەختیش دەکەنەوە کە ئێستا دەرفەتێکی نوێی پێکەوەژیان لە سووریادا هاتووەتەئاراوە، قۆناغی ڕاگوزەریش پێویستە گشتگیربێت و تیایدا حکومڕانییەکی نامەزهەبی دروستبکرێت تا لەوەزیاتر وڵاتەکە ڕووبەڕووی گرژیی نەکاتەوە.