بەریتانیا فڕۆکەی هەڵگری بۆمبی ئەتۆمی لە پێنتاگۆن دەکڕێت

ئاڤا نیوز

 

لەچوارچێوەی  بەرزکردنەوەی توانا بەرگرییەکانی، حکومەتی بەریتانیا ڕەزامەندی بە کڕینی چەندین فڕۆکەی جەنگیی هەڵگری بۆمبی ئەتۆمی لە ئەمریکا دا.

 

وێنە گەورەکە: لە مانگی ڕابردووەوە، حکومەتی بەریتانیا بە سەرپەرشتی کیەر ستارمەر، سەرۆکوەزیرانی بەریتانیا هەوڵەکانی بۆ بەرزکردنەوەی توانا بەرگری و سەربازییەکانی وڵاتەکەی چڕتر کردووەتەوە، بۆ ئەو مەبەستەش چەندین هەنگاوی ناوە، لەوانە زیادکردنی خەرجی وەزارەتی بەرگریی.

 

زانیاریی بەدەستهاتوو: ڕۆژنامەی سەندەی تایمزی بەریتانی بڵاویکردەوە، بۆ یەکەمجار لە مێژووی بەریتانیا چەندین فڕۆکەی جەنگی پێشکەوتوو کە دەتوانن بۆمبی ئەتۆمی هەڵگرن، دەکڕێت و بۆ ئەم مەبەستەش لەگەڵ ئەمریکا لە گفتوگۆدایە.

 

لەلایەکی دیکەوە: هەر بەگوێرەی میدیا ناوخۆییەکانی بەریتانیا، بڕیارە شەش کارگەی نوێی چەک و تەقەمەنی بۆ بەرزکردنەوەی توانا بەرگرییەکانی وڵاتە دروستبکرێن. وەزیری بەرگریی بەریتانیا لەمبارەیەوە دەڵێت: "مەبەستیان لە دروستکردنی ئەم بنکانە، بۆ ڕێگریکردنە لە نەیارەکانیان''.

 

زانیاریی زیاتر: حکومەتی بەریتانیا زیاتر لە دوو ملیار دۆلار بۆ دروست کردنی ئەم کارگانە خەرج دەکات و لە کارگەکاندا زیاتر لە حەوت هەزار چەکی دوورمەودا دروست دەکرێن.