کوشتارگەی هەولێر لەبارەی قوربانیکردنەوە هاونیشتمانیان ئاگادار دەکاتەوە: وەرن ناو بنووسن

ئاڤا نیوز

 

کوشتارگەری هاوچەرخی هەولێر ئەو هاونشتمانیانەی نیازی قوربانیکردنیان هەیە، ئاگاداریان دەکاتەوە، بۆ سەرەنووسین سەردانی کوشتارگەکە بکەن تاوەکو لەوێ ئاژەڵەکانیان سەرببڕدرێن.

 

وێنە گەورەکە: ڕۆژی 6-6-2025 وەکو یەکەم ڕۆژی جەژنی قوربان لەلایەن وڵاتی سعودییەوە دیاریکراوە، پەیڕەوانی ئاینی ئیسلام لەم جەژنەدا قوربانی دەکەن.

 

لێدوانی فەرمی: هەڵمەت هەمزە، بەڕێوەبەری کوشتارگەی هاوچەرخی هەولێر بە ئاڤا میدیای ڕاگەیاند: لە دوو خشتەدا ناو بۆ قوربانیکردن دەنووسین، یەکەمیان بۆ هاونیشتمانیانە، دووەمیان بۆ ڕێکخراو و دەزگا خێرخوازییەکانە، ناونووسینیش تاوەکو ڕۆژی پێنجشەممەی داهاتوو بەردەوام دەبێت.

 

بەڕێوەبەری کوشتارگەی هاوچەرخی هەولێر دەڵێت، تاوەکو ئێستا 18 هاووڵاتی و 11 ڕێکخراو و دەزگای خێرخوازی بۆ قوربانیکردن ناویان نووسیوە، کاتیشمان بۆ ئەو کەسانە داناوە کە بەشێوەی هەڕەمەکی دێن.

 

زانیاری زیاتر: ئاژەڵی گەورە بە 75 هەزار دینار و ئاژەڵی بچووک بە 25 هەزار دینار سەردەبڕێن، بۆ هەر ئاژەڵێکی گەورە هەشت هەزار دینار و ئاژەڵی بچووکیش دوو هەزار و 500 دینار بۆ حکومەت دەگەڕێتەوە، باقی پارەکەش قەسابەکان وەریدەگرن.

 

لەلایەکی دیکەوە: 21 پزیشک و کارمەندی ڤێتەرنەری لە کوشتارگەی هاوچەرخی هەولێر پشکنینی خۆڕایی بۆ ئەو ئاژەڵانە دەکەن کە خەڵک بۆ قوربانیکردن دەیبەنە کوشتارگەکە.

 

بۆچی گرنگە: ئەو ئاژەڵانەی لە کوشتارگەی هەولێر سەردەبڕدرێن سەرەڕای ئەوەی لە ڕووی تەندروستییەوە دڵنیاییان دەبێت، ئەو پاشماوەیەی دەمێنێتەوە بەشێوەیەکی زانستی لەناو دەبرێت و نابێتە هۆی بێزارکردنی خەڵک.

باکگراوند: ساڵانە لە ڕۆژی 10ی زولحجەدا موسڵمانان بەشداری لە بەجێهێنانی فەریزەی حەج دەکەن، هەروەها لە ڕۆژی نۆیەم دەچنە سەر کێوی عەرەفە و لە ڕۆژی دەیەم دێنە خوارەوە و ئەمەش دەبێتە یەکەم جەژنی قوربان، هەمان ڕۆژیش حاجیان قوربانی دەکەن.