مەسرور بارزانی لە یادی دامەزراندنی یەکێتی: جەخت لە پێویستیی پێکهێنانی کابینەی نوێ لە زووترین کاتدا دەکەینەوە

ئاڤا نیوز

 

سەرۆکوەزیران مەسرور بارزانی لە یادی دامەزراندی یەکێتیی نیشتمانیی کوردستان دەڵێت، "جەخت لە پێویستیی پێکهێنانی کابینەی نوێی حکومەتی هەرێمی کوردستان لە زووترین کاتدا دەکەینەوە".

 

وێنە گەورەکە: یەکێتیی نیشتمانیی کوردستان، 50 ساڵ لەمەوبەر لە ڕێککەوتی 1ـی حوزەیرانی ساڵی 1975 لە دیمەشقى پایتەختی سووریا لەلایەن ژمارەیەک لە سەرکردەی کوردەوە ڕاگەیێنرا.

 

پەیامی فەرمی:  سەرۆکوەزیران مەسرور بارزانی پەیامێکی پیرۆزبایی ئاراستەی سەرۆک و سەرکردایەتیی و لایەنگرانی یەکێتی دەکات و دەڵێت، "هیوای سەرکەوتنتان بۆ دەخوازم  و ئومێدەوارم یەکێتیی، وەک حیزب و لایەنێکی گرنگی هەرێمی کوردستان ، لە خەبات و تێکۆشانی خۆی لە پێناو داکۆکیکردن لە پرس و دەسکەوتە نیشتمانییەکان و قەوارەی دەستووریی هەرێمی کوردستان سەرکەوتوو بێت".

 
لە بەشێکی دیکەی پەیامەکەیدا، سەرۆکوەزیران مەسرور بارزانی باسی پێکهێنانی کابینەی نوێی حکومەت دەکات و دەڵێت، "لەم بۆنەیەدا، جەخت لە پێویستیی پێکهێنانی کابینەی نوێی حکومەتی هەرێمی کوردستان لە زووترین کاتدا دەکەینەوە، بۆ ئەوەی درێژە بە کارنامە چاکسازییەکەی و خزمەتکردنی خەڵکی کوردستان بدات و ڕووبەڕووی ئاڵنگارییە هەرێمی و ناوچەییەکان ببێتەوە."