سەرۆک بارزانی: چارەسەرکردنی کێشەکانی عێراق پابەندبوونە بە بنەمای هاوبەشی و هاوسەنگی و سازان

ئاڤا نیوز

سەرۆک بارزانی لە کۆبوونەوەکیدا لەگەڵ سەرۆك هۆز و ڕیشسپییە عەرەبەكانی پارێزگای نەینەوا ڕایگەیاند، چارەسەرکردنی کێشەکانی عێراق پابەندبوونە بە بنەمای هاوبەشی و هاوسەنگی و سازان لە چوارچێوەی دەستووردا.

وێنە گەورەکە: ئەمڕۆ یەكشەممە 1-6-2025  لە سەڵاحەددین سەرۆك مەسعود بارزانی پێشوازی لە شاندی سەرۆك هۆز و شێخ و كەسایەتی و ڕیشسپییە عەرەبەكانی پارێزگای نەینەوا كرد، شاندەکە سوپاسی گەلی كوردستان و هەڵوێستی سەرۆك بارزانییان كرد كە لە ڕۆژانی تەنگانە و لە شەڕی تیرۆریستاندا میوانداریی سەدان هەزار ئاوارەی عێراقیان لە پارێزگای نەینەوا و پارێزگاكانی دیکەی عێراق كردووە و سوپاسی قوربانیدانی هێزی پێشمەرگەی كوردستانیشیان كرد كە بەشێكی زۆری ناوچەكانی پارێزگای نەینەوایان لە ژێر دەستی تیرۆریستانی داعش ئازاد كرد و ڕایانگەیاند كە ئەو هەڵوێستە مێژوویانە هەرگیز لە یاد ناكەن و لە یاددانی نەوەكانی ئایندەشیان دەمێنێتەوە.

ڕاگەیێنراوی فەرمی: بارەگای بارزانی ڕاگەیاند، شاندی میوان، سەرەڕای ئاماژەدان بە سەقامگیری و بووژاندنەوەی هەرێمی كوردستان داوایان كرد كە هەماهەنگی و هاوكاری و پێكەوەیی لەنێوان پارێزگاكەیان و هەرێمی كوردستاندا هەبێت.

لە کۆبوونەوەی نێوان سەرۆک بارزانی و شاندی هۆزەکانی پارێزگای نەینەوا باسی ئەم تەوەرانەش کرا:

- كێشە و گرفتەكانی دانیشتوانی نەینەوا و بارودۆخی ئابووری و خزمەتگوزاریی ئەو پارێزگایە.

- داوا لە سەرۆك بارزانی کرا لە قۆناغی داهاتوودا لە پڕۆسەی سیاسیی عێراق نوێنەرایەتییەكی ڕاستەقینەیان هەبێت و كۆتایی بە نەهامەتی و گرفتەكانیان بێت.

- سەرۆك بارزانی، وێڕای ئاماژەدان بە مێژووی كێشەكانی نێوان گەلی كوردستان و حكوومەتەكانی عێراق، جەختی لەوە كردەوە كە جێیی شانازییە ناكۆكیی نێوان گەلی كوردستان و حكومەتەكانی عێراق هیچ كاتێك نەبووەتە هۆی ناكۆكیی نێوان گەلانی عێراق.

- سەرۆك بارزانی جەختیشی لەوە كردەوە كە عێراقی دوای 2003 لەسەر بنەمای هاوبەشی و هاوسەنگی و سازان و لە چوارچێوەی دەستووردا دامەزراوە و تەنیا ڕێگەی چارەسەركردنی كێشەكانی عێراق پابەندبوونی هەموو لایەكە بەو بنەمایانە، پاڵپشتیی و هاوسۆزیی خۆی بۆ داواكاری و کێشەکانی خەڵكی پارێزگای نەینەوا ڕاگەیاند و ئەوەشی دووپات كردەوە كە پێویستە ڕێگە بدرێت دانیشتووانی نەینەوا خاوەنی بڕیار و چارەنووسی خۆیان بن.