کونسوڵی ئەمریکا: ژینگەیەكی لەبار هەیە بۆ پەرەپێدانی پەیوەندیی بازرگانی لەگەڵ كوردستان

ئاڤا نیوز

كونسوڵی گشتیی ئەمریكا لە هەرێمی کوردستان ڕایدەگەیەنێت، زانكۆی ئەمریكی-كوردستان لە دهۆك، یارمەتیدەر دەبێت بۆ پەرەپێدانی پەیوەندییە بازرگانی و ئابوورییەكانی ئەمریكا و هەرێمی كوردستان، بەتایبەت كە ئێستا لە هەرێمی كوردستان ژینگەیەكی تەندروست و لەبار بۆ ئەم مەبەستە هەیە.

چیرۆكی سەرەكی: لە شاری دهۆك، بە ئامادەبوونی سەرۆكوەزیران مەسرور بارزانی ئاهەنگی دەرچووانی خولی حەوتەمینی زانكۆی ئەمریكی-كوردستان بەڕێوەدەچێت، لەمیانی بەشداریكردنی لە ئاهەنگی دەرچووان، ستیڤ بیتنەر، كونسوڵی گشتیی ئەمریكا لە هەرێمی كوردستان وتارێكی پێشكەشكرد.

لێدوانی فەرمی: كونسوڵی گشتیی ئەمریكا لە وتارەكەیدا ڕایگەیاند: زانكۆی ئەمریكی-كوردستان یارمەتیدەر دەبێت بۆ پەرەپێدانی پەیوەندییە بازرگانی و ئابوورییەكانی ئەمریكا و هەرێمی كوردستان، بەو پێیەی نەوەیەكی تازەی بە زانستی پێشكەوتووی سەردەم ئاشنا كردووە و كەشی هەرێمی كوردستانیش ژینگەیەكی لەبار و تەندروستە بۆ ئەم مەبەستە.

بیتنەر دووپاتیشی كردەوە، دەرچووانی زانكۆی ئەمریكی-كوردستان دەتوانن لە زۆر بواری خزمەتگوزاری دەرفەتی ڕۆڵبینینیان هەبێت و لە ئاست چاوەڕوانی و پێداویستی خەڵكی بن بەگشتی.