قایمقامی هەولێر: ئەمساڵ دەیان شوێنی بازرگانی و سەنتەری مەساج و ئارایشتگە داخراون

ئاڤا نیوز

قایمقامی قەزای ناوەندیی هەولێر تایبەت بۆ ئاڤا ئاشكرای دەكات، لەماوەی پێنج مانگی سەرەتای ئەمساڵدا، دەیان سەنتەری جوانكاری، ئارایشتگە، سەنتەری مەساج، نووسینگە و كۆگا خۆراكییەكان و شوێنە بازرگانییەكانی دیكە، بەهۆی پابەندنەبوون بە مەرج و ڕێنماییەكان و قۆرخكاری و ساغكردنەوەی كاڵای ماوەبەسەرچوو، داخراون.

وێنە گەورەكە: لەپێناو پاراستنی سەلامەتی و بەرژەوەندیی گشتیی هاووڵاتیان، تیمە هاوبەش و لاوەكییەكانی قایمقامیەتی قەزای ناوەندیی هەولێر، بەهەماهەنگی لەگەڵ لیژنە تەندروستییەكان و هێزە ئەمنییەكان، بەشێوەیەكی بەردەوام بەدواداچوون و پشكنین بۆ شوێنە بازرگانییەكان و كۆگا و سەنتەرە جۆراوجۆرەكان دەكەن، بەمەبەستی دڵنیابوونەوە لە ڕاست و دروستی مۆڵەتی كاركردن و پیشە، ڕێپێدانی كارمەندان و كارتی نشینگە، مۆڵەتی تەندروستی، ڕەچاوكردنی مەرجەكانی سەلامەتی و چەندین بابەتی دیكەی پەیوەست بە سەلامەتیی گشتی و ئادابی گشتی.

لێدوانی فەرمی: نەبەز عەبدولحەمید، قایمقامی قەزای ناوەندیی هەولێر، تایبەت بۆ ئاڤا ڕایگەیاند، لە ماوەی پێنج مانگی سەرەتای ئەمساڵیش بەهۆی پابەندنەبوونیان بە مەرج و ڕێنماییەكان، دەیان سەنتەر و شوێنی جۆراوجۆر، داخراون و ڕێكاری یاساییش بەرامبەر خاوەنەكانیان گیراوەتە بەر.

ئاماژەی بەوەشكرد، سەرەڕای بەردەوامی ئەركەكانی لیژنەكانی قایمقامیەت، "لەكاتی بۆنە و جەژنەكاندا ڕێكار و بەدواداچوونەكان چڕتر دەكەینەوە، بەمەبەستی ڕێگریكردن لە گرانبوونی نرخ و قۆرخكاری و ساغكردنەوەی كاڵای بەسەرچوو، لیژنە لاوەكییە تایبەتمەندەكان، پشكنین بۆ كۆگاكانی خواردەمەنی و كەرەستە خۆراكییەكان دەكەن".

لەلایەکی دیکەوە: لیژنە لاوەكییەكانی بەشی چاودێریی تەندروستی لە بەڕێوەبەرایەتیی سەلامەتی خۆراک و کاروباری پاراستنی تەندروستیی هەولێر، لە پێنج مانگی سەرەتای ئەمساڵ، 11 سەنتەری مەساج و شێلان لە هەولێر دادەخەن، ئەوەش بەهۆی پابەند نەبوونیان بە مەرجی سەلامەتی و تۆمەتباركردنی چەند كارمەندێكی نێو سەنتەرەكان بە ئەنجامدانی بەدڕەوشتی و هەبوونی كەرەستەی گومانلێكراو لەنێو سەنتەرەكان.