سوپای ئەمریکا لە دوو بنکەی ژێر دەسەڵاتی هەسەدە دەکشێتەوە

ئاڤا نیوز

سوپای ئەمریکا بەردەوامە لە چۆڵکردنی بنکە سەربازییەکانی لە ڕۆژئاوای کوردستان و سووریا، کاروانێکی دیکەی زریپۆش و کەلوپەلی لۆجێستی لە دوو بنکە لە ناوچەکانی ژێر دەسەڵاتی هەسەدە لە لادێکانی پارێزگای دێرەزۆر کشاونەتەوە.

لێدوانی فەرمی: ڕامی عەبدولڕەحمان، سەرۆکی ڕوانگەی سووری بۆ مافەکانی مرۆڤ بە ئاڤا میدیای ڕاگەیاند: لە ماوەی چەند کاتژمێری ڕابردوودا هێزەکانی ئەمریکا لە دوو بنکەی سەربازیی دیار لە لادێکانی ڕۆژهەڵاتی دێرەزۆر کشانەوەیەکی لەناکاویان ئەنجامدا.

لەلایەکی دیکەوە: سەرچاوەکانی ڕوانگەی سووری دووپاتیان کردووەتەوە، ئۆپەراسیۆنە سەربازییە هاوبەشەکان بەردەوام دەبن لە کاتی هەبوونی مەترسی ئەمنی، بە تایبەتی دژی ڕێکخراوی داعش، ئەوەش بە پاڵپشتی هاوپەیمانیی نێودەوڵەتی کە لە بنکەی "شەدادی" لە باشووری حەسەکەوە چالاک دەبن کە تاوەکو ئێستا هێزەکانی ئەمریکا لەو بنکەیە بوونیان هەیە.

ئەوەی پێویستە بیزانیت: کشانەوەی کاروانە سەربازییەکانی ئەمریکا لە 18ی ئایاری ڕابردوو بە چەند قۆناغێک دەستیپێکردووە، بەڵام لە دوو ڕۆژی ڕابردوودا پرۆسەکە خێراتر بووە.