وەزیری دەرەوەی ئێران: حووسیەکانی یەمەن فەرمان لە ئێران وەرناگرن

ئاڤا نیوز

وەزیری دەرەوەی ئێران تۆمەتەکانی ئەمریکا بۆ پشتگیری سەربازی و  فەرمانکردن بە حووسیەکانی یەمەن ڕەتدەکاتەوە.

وێنە گەورەکە: دۆناڵد ترەمپ، سەرۆکی ئەمریکا بە شێوەیەکی بەردەوام ئێران تۆمەتبار دەکات بە پشتگیری گرووپە میلیشیاکان و بە " سەرچاوەی تیرۆر " لە ڕۆژهەڵاتی ناوڕاست ناوزەندی دەکات، سەرۆک و بەرپرسانی کۆشکی سپی چەندین جار داوایان لە ئێران کردووە پشتگیرییەکانی بۆ حووسیەکانی یەمەن بوەستێنێت و هاوکاریان نەبێت لە هێرشکردنە سەر کەشتی و بنکە ئەمریکییەکان، و لە ئەگەری بەردەوامی پشتگیرییان، ئەوا ئەمریکا وەڵامی تووندی بۆ تاران دەبێت.

لێدوانی فەرمی: عەباس عێراقچی، وەزیری دەرەوەی ئێران ئەمڕۆ دووشەممە لە کۆنگرەیەکی ڕۆژنامەوانی هاوبەشدا لەگەڵ وەزیری دەرەوەی میسر لە قاهیرە، هەموو ئەو تۆمەتانەی ڕەتکردەوە کە ئێران پشتگیری سەربازی لە حووسیەکان بکات و ڕایگەیاند، "حووسیەکان سەربەخۆن لە بڕیاردان و سەرکردە و خاوەن بڕیاری خۆیان هەیە، ئەو تۆمەتانەی باس لە وەرگرتنی فەرمان لە تاران دەکەن بۆ هێرشکردنە سەر کەشتییە ئەمریکییەکان دوورن لە ڕاستیەوە و ڕەتی دەکەینەوە".

وەزیری دەرەوەی ئێران لە درێژەی وتەکانیدا ئاماژەی بە پەیوەندی دۆستانەی ئێران لەگەڵ میسر و دەوڵەتانی دراوسێ دا و ڕایگەیاند، "پەیوەندی ئێران لە گەڵ دراوسێکانی لەسەر بنەمای پەرەپێدانی پەیوەندییە دیبلۆماسی و ئابوورییەکانە و بەردەوامی پێدەدەین".