ئەردۆغان: توانای چارەسەرکردنی کێشەی تیرۆرمان هەیە

ئاڤا نیوز

 

سەرۆککۆماری تورکیا لە دوای کۆبوونەوەی لەگەڵ کاربەدەستانی وڵاتەکەی ڕایگەیاند، تورکیا جەخت لەوەدەکاتەوە توانای چارەسەرکردنی کێشەکانی هەیە و دەیانەوێت پەرە بە برایەتیی نەتەوەکان بدەن.

 

وێنە گەورەکە: دوای دەیان ساڵ شەڕی پەکەکە و تورکیا ئێستا دەرفەتێک بۆ ئاشتی ڕەخساوە و پەکەکەش لەسەر داوای ئۆجەلان ڕازی بووە بە چەکدانان و خۆهەڵوەشاندنەوە بەڵام بە مەرج.

 

لێدوانی فەرمی: ڕەجەب تەیب ئەردۆغان، سەرۆککۆماری تورکیا ڕایگەیاند، تورکیا ئەو هێزە دیموکراسییە پێگەیشتووەیە، کە توانای چارەسەری هەموو کێشەیەکی هەیە، بە کێشەی تیرۆریشەوە و پرۆسەی ئێمە بۆ تورکیای بێ تیرۆر دەبێتە بەرد و قەڵغانی ئەم هەوڵە.

- ئامانجمان پەرەپێدانی وڵاتەکەمانە و یەک بە یەک ئەو زنجیرە ژەنگاویانەی لەسەر برایەتیی ئەبەدی نەتەوەکەمان دانراون، لادەبەین.

- گوێ بە هیچ کەس و لایەنێک نادەین کە دژایەتیی پڕۆسەکە دەکات و بەردەوام دەبین لە کارەکانیان.

 

لەلایەکی دیکەوە: سەرۆککۆماری تورکیا باسی لە دۆخی ئێستا سووریا کرد و ڕایگەیاند، لەگەڵ گەیشتن بە سەقامگیری و ئارامی سووریا، پێمان وایە هەموو دراوسێکانی تەنانەت هەموو وڵاتانی ناوچەکە سوودمەند دەبن.